Riaghaltas an aghaidh tuath-èisg Fhlòdaigearraidh

Dhearbh Riaghaltas na h-Alba nach tèid gabhail ri tagradh na companaidh Organic Sea Harvest an-aghaidh co-dhùnadh Comhairle na Gàidhealtachd cead-planaidh a dhiùltadh airson tuathanas-èisg far chosta Fhlòdaigearraidh ann an ear-thuath an Eilein Sgitheanaich.

Rinn a' chompanaidh tagradh chun an Riaghaltais an dèidh dhan Chomhairle cead-dealbhachaidh a dhiùltadh toiseach na bliadhna.

Chuir muinntir baile Fhlòdaigearraidh air fad an ainmean ri litir a' cur an aghaidh an leasachaidh.

Tha cothrom fhathast aig Organic Sea Harvest a dhol gu Cùirt an t-Seisein ann an Dùn Èideann airson tagradh eile a dèanamh an aghaidh a' cho-dhùnaidh seo.

Seallaidhean

"Tha sinn dìreach air ar dòigh ghlan. Tha sinn cho toilichte," thuirt Emma Pheutan, a tha a' fuireach san sgìre.

"'S e fìor dheagh naidheachd a th' ann - gu h-àraidh leis a' bhliadhna a th' air a bhith againn," thuirt i.

B' e bòidhchead an àite fear de na rudan a bu mhotha a chuir ri co-dhùnadh an Riaghaltais cur an aghaidh an tuathanais-èisg.

"Chan eil sin a' cur iongnadh oirnn idir," thuirt Ms Pheutan.

"Thàinig tè-aithris an Riaghaltais dhan àite, 's bha sin na phàirt den obair aice, so chunnaic i fhèin far a bheil sinn a' fuireach.

"Tha mi a' smaoineachadh cuideachd dìreach, san eilean air fad tha uiread de thuathanasan-èisg ann.

"Chan eil mòran àiteannan a-nis far nach fhaic thu tuathanas-èisg.

"Dh'obraich sinn uile cho cruaidh còmhla mar choimhearsnachd le seo, fiù 's am-bliadhna, nuair a bha e doirbh dhuinn fiù 's coinneachadh.

"Cha robh cothrom againn coinneachadh so b' fheudar a h-uile càil a bhith air-loidhne.

"Tha e a' sealltainn dhuinn cho làidir 's a tha sinn mar choimhearsnachd, agus faodaidh sinn a-nis ar n-aire a chur air a rudan a tha cudromach dhuinne, mar ar cànan agus ar cultar agus ar n-eachdraidh.

"So tha a' choimhearsnachd gu lèir dòchasach gun tig rudeigin às an ionad choimhearsnachd air a bheil sinn ag obair an-dràsta, so 's e sin a tha sinn a' coimhead air," thuirt i.

Chuir am BBC fios air Organic Sea Harvest airson beachd, ach cha chualas air ais bhuapa fhathast.