Comhairle Gwynedd: 'Bidh Cuimris aig a h-uile sgoilear san t-siorrachd'

'S i Gwynedd an sgìre comhairle as làidire sa Chuimrigh a thaobh a' chànain, 's i aig 77% den t-sluagh

Dh'innis Comhairle Gwynedd ann an iar-thuath na Cuimrigh gum bi a h-uile sgoilear san t-siorrachd ag ionnsachadh tro mheadhan na Cuimris.

Tha an t-ùghdarras ionadail a' riochdachadh na sgìre as làidire a thaobh a' chànain anns a' Chuimrigh, 's tomhas ann gu bheil i aig 77% den t-sluagh.

Thèid dreach-phoileasaidh foghlaim ùr a chur mu choinneimh Comataidh Sgrùdaidh Foghlaim is Eaconomaidh na Comhairle air an 10mh là den Ghiblean.

"Tha am poileasaidh seo mar oidhirp amas Gwynedd a stèidheachadh a dhèanamh cinnteach gun èirich clann agus daoine òga na siorrachd gu bhith comasach sa Chuimris agus sgilean dà-chànanach no ioma-chànanach a leasachadh anns an t-siostam foghlaim againn," thuirt aithisg na Comhairle.

Tha cha mhòr a h-uile sgoil san t-siorrachd mar thà leis a' Chuimris mar phrìomh chànan teagaisg

Fon phoileasaidh, a tha a' Chomhairle ag ràdh a tha a rèir poileasaidh Riaghaltas na Cuimrigh gum bi millean duine a' bruidhinn a' chànain ro 2050, 's i a' Chuimris am prìomh chànan teagaisg a bhios anns a h-uile sgoil stàite san t-siorrachd.

'S e seo a' chiad ath-sgrùdadh mòr a rinn Comhairle Gwynedd air am poileasaidh foghlaim ann an còrr air 40 bliadhna.

'S i a' Chuimris mar tha prìomh chànan teagaisg agus obrach a' mhòr-chuid den chòrr air 90 sgoil a tha a' Chomhairle a' ruith san t-siorrachd.

Tha na trì sgoiltean far nach eil sin fìor - Ysgol Friars ann am Bangor, Ysgol Uwchradd Tywyn ann am baile Tywyn agus Our Lady's School, bun-sgoil Chaitligeach ann am Bangor - mar thà a' gluasad a dh'ionnsaigh làn-fhoghlam tro mheadhan na Cuimris.

Tha Gwynedd ann an iar-thuath na Cuimrigh

Coltach ri Foghlam tro Mheadhan na Gàidhlig, tha foghlam sa Bheurla ga thoirt a-steach nas fhaide air adhart agus ga leudachadh thairis air cuspairean gus am bi a' chlann fileanta san dà chànan.

Tha sgoiltean na Cuimrigh gam meas a rèir siostam ìrean le Riaghaltas na Cuimrigh a rèir 's dè na tha de Chuimris ga chleachdadh mar chànan teagaisg agus obrach na sgoile.

Fon phoileasaidh ùr thèid clann a thig a-steach gu Gwynedd à sgìrean far nach eil an cànan ga bruidhinn a chur ann am prògram bogaidh a tha ga ruith leis a' Chomhairle.

Dheadh a h-uile seirbheis do chloinn ro aois na sgoile a lìbhrigeadh sa Chuimris.

Conaltradh Poblach

Bidh a' chlann air fad gu ruige deireadh Bliadhna 2 gan teagasg 's gam measadh tro mheadhan na Cuimris a-mhàin.

Bidh aig sgoiltean ri cothroman a thoirt do sgoilearan a' Chumris a chleachdadh gu cunbhalach gach cuid am broinn agus taobh a-muigh an t-seòmair teagaisg.

Thèid foghlam curraicealach agus neo-churraicealach tron Bheurla a thoirt a-steach bho Bhliadhna 3 air adhart, ga leudachadh gach bliadhna bho 20%, leis a' Bheurla ga teagasg mar chuspair cuideachd.

Aig ìre na h-àrd-sgoile, 's i a' Chuimris am prìomh chànan teagaisg a bhios ann dhan a h-uile sgoilear gu aois 16.

Thuirt a' Chomhairle gum faigh clann agus daoine òga le feumalachdan foghlaim a bharrachd cothrom co-ionnan air a' chànan fon phoileasaidh.

Feumaidh caibineat na Comhairle agus an Làn-Chomhairle beachdachadh air a' phoileasaidh fhathast mus tèid a chur an gnìomh, agus feumar conaltradh poblach a chumail.