'Chan fhaodar leigeil le Moss Park tachairt a-rithist'

Tha casg rè ùine air daoine ùra a bhith a' gluasad a-steach gu dachaigh-cùraim Moss Park anns a' Ghearasdan an dèidh do NHS na Gàidhealtachd a gabhail thairis

Tha BPA air Ghàidhealtachd a' toirt rabhaidh gum feumar fuasgladh san ùine fhada a lorg airson cùraim shòisealta san sgìre.

Bha am ball Tòraidheach Jamie Halcrow Johnston a' bruidhinn agus dachaigh-cùraim Moss Park anns a' Ghearasdan a-niste air tighinn fo shealbh Comhairle na Gàidhealtachd, le NHS na Gàidhealtachd ga ruith.

Bho thachair sin, tha casg rè ùine air a chur air daoine ùra a bhith a' gluasad a-steach ann.

Chaidh Moss Park a chur fo sgèith NHS na Gàidhealtachd agus a' chompanaidh HC-One a bha ga ruith air innse gum feumadh iad a dhùnadh.

'S e an aon dachaigh-cùraim de a leithid a th' air fhàgail ann an Loch Abar, agus thog a' choimhearsnachd an guthan ag iarraidh gun deadh a glèidheadh.

Tha Mgr Halcrow Johnston ag ràdh nach fhaodar leigeil leis an t-suidheachadh tachairt a-rithist.

"Feumaidh an luchd-lìbhrigidh air fad tighinn còmhla 's plana a chur ri chèile a dh'aithnicheas an trioblaid a th' ann, ach cuideachd a lorgas 's a leasaicheas fuasgladh," thuirt e.

"Chan eil seo na iongnadh do dhuine. Tha an sluagh a' fàs nas sine - bidh feum againn air barrachd chùraim is taice," thuirt e.

Coimhearsnachdan

Tha gealltanasan a dhìth, a rèir Mhgr Halcrow Johnston, gur ann nas fheàrr a dh'fhàsas cùisean a thaobh cùraim shòisealta air Ghàidhealtachd, 's nach ann nas miosa.

"Chan fhaodar leigeil le seirbheisean a bhith gan ruith sìos no gan toirt air falbh," thuirt e.

"Feumaidh sinn barrachd dhachannan-cùraim air feadh na Gàidhealtachd.

"Feumaidh sinn gealltanas bhon fheadhainn a tha a-niste a' ruith Moss Park gum fuirich e fosgailte, no co-dhiù gum bi gealltanas ann air leudachadh air na tha de leapannan rim faighinn anns an sgìre.

"Chan fhaod sinn coimhead ri fuasgladh choitcheann airson na Gàidhealtachd air fad, far am bi leapannan rim faighinn an àiteachan eile ach chan ann sna coimhearsnachdan sa bheil daoine ag iarraidh fuireach.

"Ma tha do theaghlach air fad anns a' Ghearasdan no ann an Loch Abar, chan e fuasgladh a th' ann dhut a bhith air do chur an dachaigh-cùraim iomadh mìle air falbh."

Bha Mgr Halcrow Johnston a' bruidhinn an dèidh do Bhall-Pàrlamaid Lib Deamach Inbhir Nis, an t-Eilean Sgitheanach is Ros an Iar, Aonghas Dòmhnallach, iarraidh gun tèid £60m a chosg air ceithir dachannan-cùraim ùra air Ghàidhealtachd.

Thuirt NHS na Gàidhealtachd gu bheil planaichean aca sa gheàrr-ùine na h-uimhir de leapannan fhosgladh às ùr aig Moss Park, agus gu bheil iad a' cumail là fastaidh anns a' Ghearasdan an ath-sheachdain.