Rabhadh mu ghainnead bùirn

Thug SEPA rabhadh seachad gum faodadh gainnead bùirn a bhith ann tràth air an t-samhradh leis nach eil mòran uisge air a bhith againn bho chionn ghoirid.

Tha na h-aibhnichean ìosal an-dràsta, a rèir na buidhne, le cuid fìor ìosal.

Tha iad nas ìsle an-dràsta na bha iad anns a' Ghiblean 2022.

Bha tart ann as t-samhradh air a' bhliadhna sin agus chaidh bacaidhean a chur an gnìomh ann an cuid de sgìrean.

'S e Moireibh an aon àite an Alba far a bheil an t-uisge os cionn na h-ìre cumanta airson an àm-sa dhen bhliadhna.

Tha SEPA ag iarraidh air gnìomhachasan feuchainn nach cleachd iad cus bùirn is cunnart ann gum fàs e gann anns na mìosan a tha romhainn.

Thuirt SEPA gun cùm iad sùil gheur air an t-suidheachadh agus gun sgaoil iad fiosan mu ìrean gach seachdain bhon ath-mhìos.

Tha seo a' tighinn is an t-seirbheis-smàlaidh air cantainn gu bheil cunnart "mòr" ann an Alba gu lèir - air sgàth na h-aimsire - gun sgaoil teintean monaidh.

Bidh rabhadh na seirbheis-smàlaidh an sàs gu Diluain.