Dìneasaran Sgitheanach ag òl còmhla

Ged a bha iad nan sealgairean agus nan ainmhidhean a dheadh ithe, bhiodh dìneasaran a bhiodh ag ithe feòla agus feadhainn a bhiodh ag ithe lusan ag òl còmhla ri chèile aig lagùn anns an Eilean Sgitheanach bho chionn 167 millean bliadhna, a rèir rannsachaidh ùir a chaidh a dhèanamh air lorgan.

'S e an làrach aig Rubha a' Phrionnsa ann an Tròndairnis, le 131 lorgan, tè cho mòr 's a tha ann an Alba, agus tha i am measg an fheadhainn as teirce anns an t-saoghal seach gu bheil uiread de lorgan megalosauran ann.

'S e sinnsear dhan T. rex a bh' anns a' mhegalosaur.

A-nis, tha lorgan air sealltainn, a rèir luchd-rannsachaidh, gun robh sauropodan, a bhiodh ag ithe lusan, anns an àite.

Tha dùil gun robh na saurapodan a dh'fhàg lorgan ann an Tròndairnis trì tursan cho mòr ri ailbhean.

Tha eòlaichean cuideachd a' dèanamh a-mach gu bheil an taobh a tha na lorgan a' dol a' toirt orra smaoineachadh gun robh na dìneasaran a' dabhdail mu chuairt aig an lagùn, mar a bhios beathaichean a' dèanamh aig tollan-uisge an-diugh.

Chan e sin a-mhàin, tha iad dhen bheachd gum biodh na dìneasaran a' dèanamh seo tric.

Chaidh mothachadh dhe na ciad trì lorgan aig Rubha a' Phrionnsa bho chionn còig bliadhna le oileanach bho Oilthigh Dhùn Èideann agus co-obraichean.

Leis na chaidh a lorg bhon uair sin, tha an làrach am measg an fheadhainn as fharsainge ann an Alba a-nis, agus tha dùil gun tèid barrachd lorgan fhaighinn.

Thog an sgioba rannsachaidh na mìltean de dheilbh le dròn agus rinn iad modalan 3D dhe na lorgan mar phàirt den rannsachadh aca.

Chaidh an rannsachadh, air fhoillseachadh ann an PLOS One, a mhaoineachadh le Urras Leverhulme agus an Comann Cruinn-eòlasach Nàiseanta.