"Teachdaireachd gu math soilleir - tha sinn ag iarraidh stad a chur air an reic"

Coinneamh phoblach
Fo-thiotal an deilbh,

Nochd an àireamh a bu mhotha riamh aig coinneimh phoblach mun chùis oidhche Mhàirt

  • Air fhoillseachadh

Chuala coinneamh phoblach ann an Slèite gun do sgrìobh Urras Fearainn Chlann Dòmhnaill gu Comhairle Coimhearsneachd Shlèite Dimàirt a' tabhann coinneachadh riutha a bhruidhinn air an oighreachd.

Tha mì-thoileachas ann gun do chuir an an t-Urras am fearann air a' mhargaidh an t-seachdain a chaidh gun bruidhinn ri muinntir an àite an toiseach.

Chaidh a' choinneamh phoblach a chumail ann an Talla Àird a' Bhàsair oidhche Mhàirt.

Nochd mu 90 duine aig a' choinneimh - an àireamh a bu mhotha riamh a bha an làthair aig tè de na coinneamhan aig Comhairle Coimhearsnachd Shlèite.

Chan eil còmhraidhean sam bith air a bhith ann fhathast eadar a' chomhairle coimhearsnachd agus an t-Urras, ach tha coltas ann nach bi fada gus am bi iad a' bruidhinn.

"Mar a tha sinne a' tuigsinn, tha cuireadh air a bhith ann beachdachadh air pàirt a ghabhail ann am buidhinn chonaltraidh airson na sgìre ach an tèid bruidhinn mun t-slighe air adhart a thaobh na h-uimhir de chùisean," thuirt rùnaire na comhairle coimhearsnachd, Rob Ware.

"Chan fhacas briathran a' chuiridh sin fhathast, ach dh'fhaodadh gur e cothrom a th' ann an sin airson bruidhinn san àm ri teachd," thuirt e.

Rùnaire na Comhairle Coimhearsnachd, Rob Ware
Fo-thiotal an deilbh,

Rùnaire Comhairle Coimhearsnachd Shlèite, Rob Ware

Duilgheadas is Cothrom

Dh'innis a' chomhairle coimhearsnachd gun do sgrìobh iad gu Urras Fearainn Chlann Dòmhnaill ag iarraidh orra an oighreachd a thoirt far na margaidh san eadar-ama, ach nach d' fhuair iad freagairt.

"An sluagh a bha an seo a-nochd, agus an sluagh a bha a' togail fianais aig Clann Dòmhnaill Didòmhnaich, tha mi a' smaointinn gu bheil sin a' sealltainn do dhaoine nach eil a' choimhearsnachd toilichte leis an dòigh a tha an oighreachd ag obair air an reic seo," thuirt Iain MacFhionghain, a tha a' fuireach ann an Slèite.

Iain MacFhionghain
Fo-thiotal an deilbh,

Tha Iain MacFhionghain ag ràdh gur e cothrom a th' ann dhan choimhearsnachd, a thuilleadh air duilgheadas

"An teachdaireachd a tha gu math soilleir - tha sinn ag iarraidh stad a chur air an reic airson greis co-dhiù, gus am bi sinn a' faighinn cothrom airson smaoineachadh agus còmhraidhean agus deasbad nar measg fhèin air a' chuspair.

"Agus a bhith a' smaoineachadh air dè tha sinne, dè tha muinntir an àite ag iarraidh airson na coimhearsnachd agus airson na h-oighreachd anns an àm ri teachd.

"'S e cothrom a tha seo. 'S e duilgheadas a th' ann, ach 's e cothrom a th' ann cuideachd, agus sin an dòigh a' bhios sinn a' smaoineachadh air," thuirt e.

Tha dùil gun coinnich riochdairean bhon choimhearsnachd ri BPA na sgìre, Ceit Fhoirbeis, Diardaoin, agus a-rithist Diciadain an ath-sheachdain a bhruidhinn mun oighreachd.

Bidh cuideachd coinneamh phoblach ann an Slèite Diluain.