Plana 'son tuathanas-èisg san Eilean Sgitheanach air a dhiùltadh

Cha do ghabh comhairlichean Gàidhealach ri moladh airson tuathanas-èisg far chosta tuath an Eilein Sgitheanaich.

Bha Organic Sea Harvest a' sireadh 12 cèids a chur dhan mhuir faisg air Baile MacCuithein.

A dh'aindheoin 's gun robh oifigearan Comhairle na Gàidhealtachd a' moladh cead a thoirt seachad bhòt ochdnar de bhuill Comataidh Dealbhachaidh a' Chinn a Tuath an aghaidh an iarrtais le sianar a' cur taic ris.

Bha feadhainn san sgìre a' cur an aghaidh nam planaichean agus dragh orra gum milleadh an leasachadh bòidhchead an àite.

Chaidh planaichean Organic Sea Harvest airson tuathanais-èisg eile aig Flòdaigearraidh, rud beag nas fhaide deas, a dhiùltadh le Riaghaltas na h-Alba an-uiridh.