A' Chuimris air uachdar

Dh'fhaodadh nach cleachdar ainm Beurla na beinne as àirde sa Chuimrigh, Snowdon, tuilleadh - gu h-oifigeil co-dhiù.

Tha am moladh ga dheasbad le ùghdarrasan Pàirce Nàiseanta Snowdonia an dèidh gluasaid bho chomhairliche ann an sgìre Gwynedd, a th' airson 's gur e an t-ainm Cuimris "yr Wyddfa" a chleachdas buidhnean poblach bho seo a-mach, agus "Eryri" air Snowdonia fhèin.

Bidh mu 400,000 de luchd-coiseachd a' tadhal air a' bheinn, a tha 3,560tr (1,085m) de dh'àirde, a h-uile bliadhna.

Thuirt ùghdarras na pàirce nàiseanta gun coimhead buidheann-ghnìomha ris a' mholadh.

Cha deach a' chùis a dheasbad ge-tà, aig coinneimh Diciadain, ri linn 's gun deach a chur fo sgèith na buidhne-gnìomha, a chaidh a chur air chois airson stiùireadh a thoirt air mar a chleachdar ainmean-àite Cuimris.

'S e is ciall do Yr Wyddfa "An Uaigh".

A rèir beul-aithris, chaidh fuamhaire, air an robh Rhita Gawr, a bha na rìgh air a' Chuimrigh, a thìodhlacadh fo chàrn air mullach na beinne, an dèidh cath leis an Rìgh Artair.

Rinn am fuamhaire a' chùis air 30 rìgh Breatannach, ('s iomadh fear dhiubh ann aig an àm) 's gun do rinn e cleòc le am feusagan, a ruith bho a ghuailnean gu làr.

Tha ainm Cuimris Snowdonia "Eryri", a' ciallachadh, a rèir choltais, "Èirigh", bhon Laidean: oriri.

Tha a' Chuimris ga bruidhinn gu làitheil am measg coimhearsnachd na sgìre

Chaidh sin a chlàradh 'son a' chiad uair san 9mh Linn, a dh'aindeoin beachd a bh' ann 'son ùine mhòir gur ann bhon Chuimris 'son Iolaire "Eryr" a thàinig an t-ainm.

Tha dùil gur e "Cnoc an t-Sneachda" as ciall don ainm Bheurla, (Snow Dune) - ainm a tha ainmeil, agus a th' air a bhith ann fad linntean mòra.

'S e sgìre a th' ann ge-tà, far a bheil an cànan Cuimris ga bruidhinn sa choimhearsnachd, agus far a bheileas a' feuchainn ri sin a ghlèidheadh.

Ma ghabhas ùghdarras na pàirce nàiseanta ris a' mholadh, cha b' e sin a' chiad uair a chaidh ainm dùthchasach a chur gu h-oifigeil an àite ainm Beurla air beinn.

Chaidh an t-ainm dùthchasach Uluru a bhuileachadh air creig mhòir ainmeil ann am meadhan Astràilia ann an 1993, ag atharrachadh bho Ayers Rock, a bh' air ainmeachadh an dèidh seann Phrìomhaire Astràilia a Deas, Sir Henry Ayers, gu cànan thùsanach na sgìre, an sluagh Anangu.

Ann an 2002, chaidh Uluru a chur air thoiseach, 's an dà ainm ga chleachdadh. Canaidh cha mhòr a h-uile duine an Astràilia Uluru a-niste.

Thuirt an Comh. John Pughe Roberts, a chuir an gluasad air adhart aig Comhairle Gwynedd, gun robh mòran bhall "a' gearain air daoine ag atharrachadh ainmean thaighean, ainmean chreagan, 's a' cur ainmean eile air na beanntan".

Bidh na ceudan mhìltean luchd-turais a' tadhal air a' bheinn a h-uile bliadhna.

A' bruidhinn air a' phrogram Dros Frecwast aig BBC Radio Cymru, thuirt Mgr Roberts, a tha a' riochdachadh Corris Mawddwy ann an Gwynedd: "Anns an sgìre seo, mar eisimpleir, 's e a-niste Hellfire Pass a th' air a dhol air Bwlch y Groes, Longmeadow a tha a-niste air Dol Hir, agus tha seo a' tachairt ann an grunn sgìrean".

Thuirt e gur e briseadh-dùil a bh' ann dha nuair a chuala e gur ann le buidhinn-ghnìomha na pàirce nàiseanta, seach leis a' bhòrd fhèin, a dheadh a' chùis a dheasbad.

"Tha mòran bruidhinn ann mu dhaoine ag atharrachadh ainmean Cuimris thaighean gu Beurla, agus seann ainmean-àite a bhith gan ruaigeadh, ach tha dleastanas air an roinn phoblaich stiùir a ghabhail air seo, seach a bhith a' leigeil le biurocrasaidh an cnogan a bhreabadh sìos an rathad gu ruige comataidh eile," thuirt e.

Thuirt cathraiche Ùghdarrsa Pàirce Nàiseanta Snowdonia, Wyn Ellis Jones: "Cho-dhùin buill an ùghdarrais nach robh feum ann beachdachadh air a' ghluasad Diciadain, seach gun deach buidheann-ghnìomha a stèidheachadh mar thà airson dèiligeadh ri ainmean-àite Cuimris.

"Tha seo an dèidh co-dhùnaidh a rinn buill roimhe sa bhuidhinn-ghnìomha a mhol stiùireadh a stèidheachadh a thaobh cleachdadh ainmean àite leis an ùghdarras."

Thuirt e cuideachd gum beachdaicheadh buill an ùghdarrais air na cùisean seo aon uair 's gun dèanadh a' bhuidheann-ghnìomha molaidhean.

"Tha an t-ùghdarras gu mòr airrson cleachdadh ainmean-àite dùthchasach a dhìon agus a bhrosnachadh ann an cleachdadh làitheil, aig an àm seo agus san àm ri teachd," thuirt e.