Oidhirp gus Cultarlann Inbhir Nis a stèidheachadh

Luchd-iomairt ann an Inbhir Nis Disathairne.

Tha oidhirpean a' leantainn gus ionad Gàidhlig a stèidheachadh ann an Inbhir Nis.

'S e Cultarlann a bhiodh aca air.

'S e àite a bhiodh ann far an deadh an cànan agus an cultar a bhrosnachadh, agus far an gabhadh coimhearsnachd Ghàidhlig a' bhaile a thoirt còmhla.

Chruinnich cuid de Ghàidheil sa bhaile Disathairne gus aire dhaoine a tharraing chun na h-iomairt.

Aig an ìre seo tha iad a' feuchainn ri togalach a lorg a bhiodh freagarrach air a shon.

"Tha mi a' smaoineachadh an-dràsta 's dòcha gu bheil còir againn àite beag a lorg agus tòiseachaidh sinn beag air bheag." thuirt Oifigear Leasachaidh a' Chultarlainn Susanne NicDhòmhnaill.

"Tha sinn cuideachd an dùil iomairt crowd-funder a chur air dòigh."

"'S e na Gàidheil, luchd-ionnsachaidh na Gàidhlig agus duine sam bith aig a bheil ùidh anns a' Ghàidhlig, àite far am b'urrainn dhaibh uile a thighinn còmhla.

Eisimpleir na h-Èireann

'S e facal Èireannach a th'ann an cultarlann agus 's ann an sin a thòisich iomairt airson cultarlann a stèidheachadh anns na 1970an.

Tha fear gu math soirbheachail air Bóthar na bhFál air taobh siar Bheal Feairste, Cultúrlann McAdam Ó Fiaich, a tha a' gabhail a-steach cafe, bùth-leabhraichean agus seòmraichean airson clasaichean agus coinneamhan a chumail.

Dh'fhosgail cultarlann eile an-uiridh - Aonach Mhacha, ann an Àrd Mhacha, às dèidh dhaibh taic-airgid luach còrr is £1m fhaighinn bho Riaghaltas Èirinn a Tuath.

Chan e iomairt ùr a tha seo ann an Inbhir Nis ge-tà is grunn bhliadhnaichean ann bho chaidh bruidhinn air an leithid an toiseach.

Ann an 2018 chaidh sgrùdadh iomchaidheachd a dhèanamh le Urras Dualchais na h-Alba agus iad a' feuchainn ri Talla Cuimhneachaidh an Dotair MhicIlleDhuibh a cheannach.

Cha deach leotha.

Ach às dèidh bliadhna gu leth gun dad sam bith a bhith a' tachairt ri linn Covid, tha a' bhuidheann misneachail.

Tha iad an dùil sreath de thachartasan a chumail sna mìosan a tha romhainn cuideachd.