Duaisean Dèan Diofar a' BhBC gan cuir air bhog an Alba 'son a' chiad uair

Tha BBC Radio Alba agus BBC Radio nan Gàidheal a' tighinn còmhla gus togail air cho cudromach 's a tha gaisgich coimhearsnachd air feadh Alba le bhith a' cur air bhog Duaisean Dèan Diofar a' BhBC 2025.

Tha an dà stèisean ag iarraidh air luchd-èisteachd tagraidhean a chur a-steach a tha a' togail air na daoine a tha air obair iongantach a dhèanamh sna coimhearsnachdan aca fhèin.

Seo a' chiad uair a tha na duaisean air a bhith air an cumail ann an Alba. Thòisich iad ann an Sasainn ann an 2022 agus thathar ag amas air cliù agus aithne a thoirt do dhaoine a tha a' dèanamh an t-uabhas do dhaoine eile agus do na coimhearsnachdan ionadail aca fhèin.

Tha ochd roinnean ann – nam measg Duais na Buidhne Coimhearsnachd, Gaisgeach Òg dhaibhsan fo aois 16 a th' air buaidh shònraichte a thoirt air a' choimhearsnachd aca, a thuilleadh air Duais Spòrs do chuideigin a th' air taic is cuideachadh a thoirt do dhaoine tro spòrs no cur-seachad eile.

Thèid na tagraichean a thaghadh le panail de bhritheamhan.

Thèid na buannaichean fhoillseachadh aig cuirm anns an t-Sultain 2025.

Thuirt Kaye Adams, preasantair Mornings air BBC Radio Alba: "Tha gaisgich ann an iomadach cruth agus ma tha neach sa choimhearsnachd agadsa, tha sinn airson cluinntinn mun deidhinn.

"Seo an cothrom aithne a thoirt dhaibhsan a tha gu socair "a' dèanamh diofar".

"'S dòcha gur e nàbaidh a th' ann, neach a tha ag obair gu saor-thoileach no neach a th' air tòrr airgid a chruinneachadh.

"Seo a' chiad uair a tha na duaisean ann an Alba agus mar sin, feuch gun innis thu dhuinn cò a tha airidh air an urram seo far a bheil thusa a' fuireach."

Tha tagraidhean a-nise fosgailte agus dùinidh iad Diluain 31mh den Mhàrt 2025 aig 5:00f.

Airson liosta de roinnean agus airson fios air mar a nì thu tagradh, thigibh gu bbc.co.uk/makeadifference agus chì sibh na riaghailtean air fad an sin cuideachd.

Roinnean 2025

Duais Saor-thoileach – do neach a tha a' dèanamh diofar susbainteach sa choimhearsnachd aca le bhith a' cuideachadh dhaoine eile san ùine aca fhèin.

Duais Gaisgeach Òg - dhaibhsan fo aois 16 a th' air buaidh shònraichte a thoirt air a' choimhearsnachd aca no a tha air cliù air leth a chosnadh dhaibh fhèin.

Duais Nàbaidh Sgoinneil – do neach a tha cuideachadh le bhith a' toirt piseach air an nàbachd aca – gu cunbhalach no tro aona rud sònraichte.

Duais Spòrs – do neach no do bhuidheann a th' air spòrs no eacarsaich a chleachdadh mar dhòigh gus piseach a thoirt air beatha dhaoine eile sa choimhearsnachd aca.

Duais Beathaich – do bheathach sònraichte a tha a' toirt piseach air beatha dhaoine no neach no buidheann a tha a' cuideachadh le bhith a' coimhead às dèidh bheathaichean.

Duais Uaine – do neach no buidheann a tha air piseach a thoirt air an àrainneachd aca no a th' air a bhith a' glèidheadh na h-àrainneachd ionadail aca.

Duais Togail Airgid - do neach no buidheann a tha air a dhol gu saothair mhòir gus airgead a chruinneachadh sa choimhearsnachd aca.

Duais na Buidhne Coimhearsnachd – do bhuidheann a th' air cuideachadh le bhith ag atharrachadh beatha dhaoine eile sa choimhearsnachd aca.