Thòisich iomairt £500,000 a thogail airson Cultarlann Inbhir Nis

An cruinneachadh far an deach iomairt togail-airgid a chur air chois.

Tha luchd-iomairt airson ionad Gàidhlig a stèidheachadh ann am prìomh-bhaile na Gàidhealtachd.

Tha iad ag amas air £500,000 a chruinneachadh airson togalaich ùir neo airson fear a cheannach far am bi Cultarlann Inbhir Nis.

Tha iad an dòchas £50,000 a thogail an toiseach a dhearbhadh gu bheil daoine sa bhaile, ann an Alba air fad, agus air feadh an t-saoghail a' cur taic ris a' phròiseact.

Tha iad ag amas air coimhearsnachd Ghàidhlig a chruthachadh le bhith a' stèidheachadh àite-coinnichidh aoigheil do luchd-bruidhinn agus luchd-ionnsachaidh a' chànain, luchd-tadhail, agus a h-uile duine sa bheil ùidh sa chànan agus an dualchas.

Bidh Cultarlann Gàidhlig Inbhir Nis a' taisbeanadh a' chànain agus a' chultair

'S i Magaidh Mulholland cathraiche Cultarlann Inbhir Nis: "Tha sinn ag amas an toiseach air £50,000 a thogail, ceum gu math cudromach a dh'ionnsaigh na targaid againn de £500,000.

"Tha sinn an dòchas gun seall seo gu bheil taic ann air a shon bho mhuinntir Inbhir Nis, na Gàidhealtachd, na h-Alba agus gu h-eadar-nàiseanta.

"Chan eil baile eile san t-saoghal sa bheil na h-uimhir de luchd-labhairt na Gàidhlig agus tha na ceudan de dhaoine òga sa choimhearsnachd a rinn foghlam tro mheadhan na Gàidhlig.

"Tha sinn airson seo a chomharrachadh le bhith a' togail àite far an tig sean agus òg còmhla a bhruidhinn na Gàidhlig ann an àrainneachd nàdarrach," thuirt i.

Tha Cultarlann Inbhir Nis a' faighinn taic bho Bhòrd na Gàidhlig, prìomh bhuidheann leasachaidh a' chànain ann an Alba.

Thuirt Shona Nic'illInnein, Ceannard Bhòrd na Gàidhlig: "'S e an t-amas againn gum bi a' Ghàidhlig air a cluinntinn agus air a faicinn air feadh Alba airson sealltainn do dhaoine mar a thathar ga cleachdadh bho là gu là agus gun tuig iad cho luachmhor 's a tha i a thaobh eaconamaidh agus cultar na dùthcha.

"Le bhith a' cumail taic ri Cultarlann Inbhir Nis tha sinn a' coileanadh gealladh Plana Nàiseanta na Gàidhlig taic a thoirt do choimhearsnachdan Gàidhlig nam bailtean mòra soirbheachadh.

"Tha sinn a' guidhe dhaibh gach soirbheas le an iomairt dachaigh a chruthachadh dhan Ghàidhlig ann an Inbhir Nis."