Agus sin e bhuainn an seo 'son an fheasgair. Cuimhnichibh air Aithris an Fheasgair air BBC Radio nan Gàidheal aig 5f is An Là air BBC ALBA aig 8f. Gheibh sibh an naidheachd air fad mu cho-labhairt ChnaG an sin, coltach ri na prìomh naidheachdan eile gu h-ionadail, gu nàiseanta is gu h-eadar-nàiseanta.

Fàgaidh sinn sibh le cruinneachadh de sheann dhealbhan agus stuth a chaidh fhoillseachadh thar nam bliadhnaichean le CnaG.

Taing 'son a bhith còmhla rinn.

Dòmhnall MacNèill a' dèanamh choimeis eadar goireasan do dh'òigridh ann an Alba agus dùthchannan Ceilteach eile.

Thig a' cho-labhairt gu ceann a dh'aithghearr a-nise ach seo na prìomh phuingean:

Tha maoineachadh ùr eadar £9m is £12m a dhìth airson Gàidhlig ath-bheòthachadh mar chànan coimhearsnachd am measg òigridh

Thàinig an t-iarrtas seo bho Cheannard Chomunn na Gàidhlig Dòmhnall MacNèill 's e a' foillseachadh phlanaichean airson ro-ìnnleachd ùr nàiseanta òigridh.

Chuala a' cho-labhairt gun robh cleachdadh na Gàidhlig air a dhol air ais gu mòr anns na coimhearsnachdan taobh a-muigh na sgoile.

Thuirt Dòmhnall MacNèill gum biodh 140 oifigear leasachaidh coimhearsnachd a dhìth agus Ionad Òigiridh Nàiseanta far an rachadh daoine òga gu cur-seachadan còmhla.

A' bruidhinn ann am buidhinn a bha a' leantainn ghnothaichean air-loidhne, thuirt an t-Oll. Wilson MacLeòid gur e là air leth inntinneach is feumail a bh' ann agus gum bu chòir do chruinneachaidhean mar seo a bhith ann nas trice.

Tha e coltach gun tèid na beachdan is molaidhean a thig bho na buidhnean beaga uile an-diugh a thoirt ri chèile ann an aithisg air a' cheann thall.

Thuirt Sarah Fhriseal bho Stòrlann Nàiseanta na Gàidhlig gu bheil gach buidheann Ghàidhlig fa leth ag obair gu cruaidh airson an aon cheann-uidhe a ruighinn.

Tha a' cho-labhairt a-nis a' briseadh airson greis gus cnuasachadh air a' cheist seo: dè na prìomhachasan no prionnsabalan a bu chòir a bhith ann airson ro-innleachd Gàidhlig na h-òigridh?

Fhad 's a tha cùisean nan tàmh ann an Steòrnabhagh, barrachd bho òigridh Ghlaschu is Annabel NicIllinnein air beachd fhaighinn bhuapa mu shuidheachadh na Gàidhlig ann am Baile Mòr nan Gàidheal.

Tuilleadh an seo.

Cha robh a' chlann-nighean seo às na Hearadh leisg na beachdan acasan air co-labhairt ChnaG a thoirt seachad.

Tha cothrom eile ann a-nise airson cupa tì is cofaidh is bidh às dèidh sin seiseanan eile deasbaid ann am buidhnean beaga.

Gu leòr ri dheasbad cuideachd às dèidh na chuala sinn bho Dhòmhnall MacNèill.

Dòmhnall Moireasdan
BBC Naidheachdan

"Tha Gàidhlig Fionnlaigh òig - a thogadh an Dùn Èideann ann an dachaigh gun Ghàidhlig (ged a bha i aig a sheanair Sgitheanach) - cho fileanta 's cho blasta 's cho Gàidhealach ri duine a chuala mi a-riamh.

"Ge bith dè tha Fionnlagh a' gabhail, 's e freagairt na cùise a thoirt dhan h-uile duine òg eadar Hiort is Peairt!"

Katrina Laurie agus Lisa Reid a' bruidhinn air toraidhean an rannsachaidh a thàinig às an t-suiribhidh a rinn CnaG am measg òigridh.

Tha Fionnlagh ag ràdh nach biodh Gàidhlig aigesan mura b' e FtMG ach gu bheil e follaiseach gu bheil feum air barrachd na foghlam a-mhàin.

Tha a' cho-labhairt a-nise a' cluinntinn bho Fhionnlagh Lawson.

'S ann à Dùn Èideann a tha e bho thùs is e a-nise na oififgear aig CnaG ann an Sgìre Loch a Tuath.

Tha e ag ràdh, ged nach robh Gàidhlig aig a phàrantan, gun robh tòrr spèis agus ùidh aca sa chànan agus gun do chuidich sin.

Am measg nan dùbhlan as motha, tha i ag ràdh, tha a bhith a' brosnachadh na cloinne gus Gàidhlig a bhruidhinn ri càch a chèile, agus daoine gu leòr le Gàidhlig a lorg airson na seiseanan aca a chumail.

"Tha sinn airson sealltainn dhan òigridh gu bheil cothroman sa Ghàidhlig" tha Kathleen NicDhòmhnaill ag ràdh, is gum bi gàire air an aodann.

"Tha e cho cudromach a' choimhearsnachd a thoirt leinn nuair a tha sinn a' dèanamh phròiseactan", thuirt i cuideachd.

"Boireannach òg, glic le tonaisg!" tha Dòmhnall Moireasdan ag ràdh.

Cò às a tha Dòmhnall a-rithist?

Tha Kathleen NicDhòmhnaill, oifigear iomairt le CnaG, a-nis a' bruidhinn. 'S i an t-oifigear airson sgìre Ùige agus Breascleit - an sgìre as bòidhche ann an Alba, thuirt i!

Dòmhnall Moireasdan
BBC Naidheachdan

"Tha CnaG ag iarraidh gun deadh lìonrath oifigearan coimhearsnachd a bhrosnaicheadh an òigridh a leudachadh gu mòr. Tha e soilleir gur e an teachdaireachd a tha a' tighinn air ais bho òigiridh gu bheil iad a' call misneachd a thaobh bruidhinn Gàidhlig seach nach eil cothroman gan cur air dòigh dhaibh airson a bruidhinn gu saoirsineil am measg an co-aoisean ann an suidheachaidhean sòisealta.

"Ma tha teachdaireachd misneachd a' tighinn às a' Cho-labhairt seo 's e gu bheil an òigiridh ag iarraidh sin agus gu bheil CnaG airson structur ùr nàiseanta a chruthachad airson sin a thoirt dhaibh.

"Ach dh' iarradh sin na milleanan notaichean. A bheil na h-ùghdarrasan agus an Riaghaltas deiseil an ceum sin a ghabhail?"

Chuala iad beachd bho òìgridh ciamar as urrainn dhaibhsan a' Ghàidhlig a chumail a' dol mura h-eil iad a' cluinntinn a' chànain bho inbhich is daoine eile timcheall orra?