Bha suidheachadh na Gàidhlig ga dheasbad ann an Steòrnabhagh Diardaoin
'S e Comunn na Gàidhlig a chuir an tachartas air dòigh mar phàirt de na tha iad a' dèanamh gus 40 bliadhna den bhuidhinn a chomharrachadh
Bha fòcas gu sònraichte air Gàidhlig am measg na h-òigridh
Thuirt ceannard ChnaG nach deach ach an dàrna leth den mhodail 'son FtMG a chruthachadh, is gu bheil feum air sùil às ùr taobh a-muigh na sgoile
Tha CnaG ag iarraidh gun deadh lìonrath oifigearan coimhearsnachd a bhrosnaicheadh an òigridh a leudachadh gu mòr
A' bruidhinn aig a' cho-labhairt, thuirt fear de sheann cheannardan ChnaG, John Angus MacAoidh, gu bheil feum às ùr air "miseanaraidhean" Gàidhlig dha na coimhearsnachdan
Bha faireachdainn aig a' cho-labhairt gur e cruinneachadh gu math feumail a bh' ann is gum bu chòir barrachd den leithid a bhith ann
Air thoiseach air a' cho-labhairt nochd rabhadh às ùr mu staing na Gàidhlig aig ìre na coimhearsnachd
Tha daoine ann an Siabost ag ràdh gu bheil an suidheachadh a-nise nas miosa na bha e nuair a rinneadh rannsachadh ann an 2011 a thog draghan mòra mu chleachdadh na Gàidhlig
Aig an dearbh àm, tha Gàidheil òga ann an Glaschu air a bhith ag innse do BBC Naidheachdan gu bheil iadsan misneachail mun chànan sa bhaile
Tha sinn an dùil bruidhinn ri ceannard ChnaG, Dòmhnall MacNèill, air Aithris na Maidne eadar seo is 08:00.
A' bruidhinn ri BBC Naidheachdan an-uiridh, thuirt Mgr MacNèill gu bheil cruaidh fheum air deasbad mu shuidheachadh na Gàidhlig.
Ceithir bliadhna deug bhon rannsachadh sin a thog ceistean mòra mu chleachdadh na Gàidhlig ann an Siabost, tha feadhainn san sgìre ag ràdh gu bheil an suidheachadh a-nise nas miosa.
Dh'fhàs Gillian NicIlleathain suas sa bhaile is fhuair i buannachd à sgeamaichean taice a bh' ann às dèidh rannsachadh 2011. A' bruidhinn ri Ailig John Moireasdan, thuirt i nach eil feadhainn de na prògraman sin a-nise ann.
Tha sgioba Aithris na Maidne a' craoladh beò à Taigh-òsta a' Chaladh an Steòrnabhagh, far a bheil co-labhairt mhòr mun Ghàidhlig ga cumail. Tha ceangal gu Aithris na Maidne aig mullach na duilleige.
Sgioba Aithris na Maidne
Ach air thoiseach air a' cho-labhairt tha rabhadh ann às ùr mu staid na Gàidhlig aig ìre na coimhearsnachd.
Tha BBC Naidheachdan air a bhith a' bruidhinn ri daoine ann an Siabost an Leòdhas, far an do sheall rannsachadh ann an 2011 gun robh a' Ghàidhlig ann an suidheachadh cugallach dha-rìribh.
Tuilleadh mun sin ri thighinn.
'S ann an-uiridh a bha Comunn na Gàidhlig 40 bliadhna a dh'aois is tha co-labhairt an là an-diugh na pàirt mhòr de na bha iad 'son dèanamh gus a' chlach-mhìle sin a chomharrachadh.
"Tha mar gum biodh dà leth den cho-labhairt seo", dh'innis ceannard ChnaG, Dòmhnall MacNèill, do BBC Naidheachdan.
"Tha sinn a' smaoineachadh gu bheil e cudromach a bhith a' comharrachadh 40 bliadhna de Chomunn na Gàidhlig agus a bhith a' coimhead air na tha air tachairt anns na bliadhnaichean a tha siud - ach dha-rìribh dha-rìribh a bhith a' coimhead air adhart.
"Tha CnaG an sàs ann an obair-deasachaidh air ro-innleachd òigridh agus bidh siud fòcas na dàrna pàirt den cho-labhairt".
Ciamar a ghabhas an òigiridh a bhrosnachadh a bhith a' bruidhinn na Gàidhlig nas cunbhalaiche? 'S e siud a' cheist mhòr aig cridhe co-labhairt ann an Steòrnabhagh an-diugh.
'S e Comunn na Gàidhlig a tha air a cùlaibh is seo mar phàirt de na chuir iad air dòigh gus 40 bliadhna den bhuidhinn a chomharrachadh.
Tòisichidh a' cho-labhairt fhèin ann an Taigh-òsta a' Chaladh aig 09:30m is bidh sinn ga leantainn tron là le sgioba againn ann an Steòrnabhagh.
Ron sin ge-tà, bheir sinn thugaibh Aithris na Maidne (ceangal aig mullach na duileige) bho 07:30m le sùil gu mòr air a' cho-labhairt agus suidheachadh na Gàidhlig, is Dòmhnall Moireasdan ag aithris à Taigh-òsta a' Chaladh.
Fàn còmhla rinn!
