Tha Dòmhnall Màrtainn ag ràdh gu bheil e follaiseach gu bheil mòran chloinne ris am bruidhinn e an-diugh a' faicinn na Gàidhlig mar rud na sgoile. Agus tha tòrr de na dachaighean anns nach eil Gàidhlig. 'S e trioblaid mhòr a tha sin, thuirt e, agus chan eil freagaurt aige-san ciamar a ghabhas leasachadh.

Tha Dòmhnall MacNèill ag aontachadh leis a sin. Tha e ag ràdh nach eil am freagairt aige-san a bharrachd. Ach tha e follaiseach a-nise gun deach a' chiad phàirt dhen obair a dhèanamh - sin foghlam anns an sgoil - ach tha cruaidh-fheum a-nise air an darna pàirt - leasachadh taobh a-muigh sgoile?

Tha ceistean a' frasadh a-steach bhon fheadhainn a tha an làthair aig co-labhairt ChnaG ann an Steòrnabhagh agus cuideachd bhon fheadhainn a tha san èisteachd air loidhne.

Ceist a-nise bho Anna NicSuain à Nis.

"Ag èisteachd ri Aithris na Maidne an-diugh, chaidh a dhèanamh gu math soilleir mar a tha na coimhearsnachdan againn air atharrachadh le leithid daoine a' tighinn a-steach is eile".

Tha i ag ràdh gu bheil cruaidh-fheum air obrachadh a-mach ciamar a nì sinn ar slighe leis a' Ghàidhlig anns an t-saoghal ùr a tha sin.

Domhnall MacNeill a' bruidhinn a-nise: "Bha telebhisean cudromach an uairsin, agus tha fhathast. Ach tha an saoghal air atharrachadh. Tha TikTok is meadhanan-sòisealta is eile a' cheart cho cudromach an-diugh 's a bha telebhisean an uairsin. Feumaidh sinn dòighean fhaighinn air cluasan is sùilean dhaoine òga a tharraing chun na Gàidhlig tro na nòsan ùra a tha sin".

Tha Mgr MacAoidh ag innse mar a rinn iad argamaid 'son taic-airgid 'son telebhisean na Gàidhlig.

"Làthaichean Thatcher a bh' ann, dh'fheumadh argamaid a bhith air a dhèanamh gun dèanadh e feum dhan eaconamaidh a thuilleadh air a' Ghàidhlig.

Thog iad lìonraidhean dhaoine cùl gnothaich a thug cothrom dhaibh an argamaid airson taic is airgid dhan chànan fhaighinn gu cluasan riaghaltais - eadhan cluasan Mairead Thatcher fhèin, thuirt e.

B' e an eaconomaidh bu chudromaiche do Mhairead Thatcher, agus bha iad a' dèanamh argamaidean eaconomaigeach.

Ceist air-loidhne a-nise bhon Oll Rob Dunbar: Am b' urrainn dhuibh rudeigin a ràdh mun iomairt 'son telebhisean a thàinig gu buil leis an CTG?

John Angus MacAoidh: "'S e an t-adhbhar a bha sinn a' meas telebhisean cudromach anns na h-ochdadan gun robh pàrantan ann an dachaighean a 'bruidhinn Gàidhlig ris a' chloinn aca, ach bha bocsa mòr anns a' chòrnair nach robh a' bruidhinn ach Beurla.

"Bha sin na thrioblaid".

John Angus MacAoidh: "Aig an toiseach bha sinn a' cur dhaoine mar "mhiseanaraidhean" dha na coimhearsnachdan. Bha iad a' cur an sùilean phàrantan cho cudromach 's a bha foghlam tro meadhan na Gaidhlig" .

Tha e ag radh - mu ghabhas an t-airgead faighinn - gu bheil miseanaraidhean a dhìth a-rithist airson obrachadh am measg òigiridh anns na coimhearsnachdan.

Thuirt Dòmhnall MacNèill gum bi e a' bruidhinn feasgar aig a' cho-labhairt air mar a ghabhas structur ùr cur an sàs airson obair òigiridh.

"Ma tha sinn airson 's gum fairich an òigiridh nach e obair-sgoile a th' ann, feumaidh e tachairt taobh a-muigh na sgoile", thuirt e.

'S e sin a' cheist a chuir Anna Frater air adhart.

Fhreagair Ailean Caimbeul gu bheil ionmhas daonnan na dhùbhlan, ach gur e an rud as cudromaiche innleachd a dhealbh gus òigiridh a bhrosnachadh gus ùidh is moit a nochdadh nan cànan agus an cànan sin a chleachdadh agus fhàs.

Thuirt e gu bheil feum air tuigse fhaighinn bhon òigridh air dè tha iadsan ag iarraidh. Sin puing a thog e air Aithris na Maidne nas tràithe.

Tha Dòmhnall Màrtainn ag aontachadh gur e sin am prìomh dhùbhlan san àm ri teachd, agus gur e CnaG am prìomh bhuidheann air a bheil uallach sin a dhèanamh am measg òigridh.

Tha John Angus MacAoidh ag ràdh gu bheil ceist an airgid daonnan gu bhith na dùbhlan . Ach chan e rud a-mhàin ann an saoghal na Gàidhlig a tha sin, thuirt e. Tha an aon rud na thrioblaid dha na comhairlean agus do bhuidhnean poblach eile.

Bidh ceistean gan cur bhon làr, air-loidhne agus bhon chathraiche, Domhnall MacSuain, air an triùir sheann cheannardan agus air Dòmhnall MacNèill.

Dòmhnall MacNeill: "Bho 2011 thug sinn fòcas làidir air obair òigiridh. Tha sin air feum a dhèanamh dhuinne, agus tha mi an dòchas gu bheil sinn air feum a dhèanamh dhan òigiridh".

Thog e mar a tha Spòrs Gàidhlig air feum mòr a dhèanamh agus mar a dh'aithnich iad gur e dòigh a bh' ann an sin aire na h-òigridh a ghlacadh - tro a bhith a' tabhainn chothroman spòrs tron Ghàidhlig.

Tha Dòmhnall Moireasdan, am fear-naidheachd againn aig a' cho-labhairt, ag ràdh gu bheil e na iongnadh gun deach leasachadh idir a dhèanamh le sgainnealan mar sin a' dol air adhart!

Uill gheall iad fealla-dhà is fhuair sinn an sin e.

Tha a' cho-labhairt a-nise cluinntinn bhon cheannard a th' ann, Dòmhnall MacNèill.

Tha Dòmhnall Màrtainn ag ràdh gum bi rannsachadh ann mun seo....

Nise, tha Dòmhnall MacSuain ag ràdh nach do ràinig e Dun nan Gàll idir is gun do chuir e seachad seachdain ann an Glaschu!

Tha Mgr Màrtainn a' bruidhinn air sgeama greis gnìomhachais nan oileanach. Dh'innis e mar a chaidh Dòmhnall MacSuain gu Dùn nan Gall fon sgeama agus gun d' fhuair iad fios gun deach e air chall!

Chaidh a lorg ge-tà.

Thuirt Mgr Màrtainn gun robh amharas aig an àm gur ann a bha Dòmhnall MacSuain air a dhol am measg luchd nan caorach ann an Dùn nan Gall 's e a' lorg rùda airson a cheannach...

Tha Dòmhnall Màrtainn a' bruidhinn air an fheum a rinn airgead às an Aonadh Eòrpach dhaibh...rud nach eil ann an-diugh.

Thuirt e gun robh esan ag obair a-mach às a' gharaids aige fhèin aig an àm sin - "ag obair bhon taigh fada mus robh Covid ann, ach nach b' e WFH a bh' ann idir ach WFG - Working From Garage."

Tha an treas ceannard a bha air CnaG - Domhnall Màrtainn - a-nis a' bruidhinn.

"Bha sinn ag obair am measg òigiridh. Ach bha ceum air adhart agus ceum air ais ann ri linn dìth airgid, gu h-àraid a thaobh chomhairlean. Thòisich mi a' beachdachadh air mar a ghabhadh cùisean cur air bhun-stèidh nas seasmhaiche.

"Bha aithisg chudromach againn sna 90an a nochd gun robh a' Ghàidhlig aig an àm sin a' cur 1,000 cosnadh agus £41m ri eaconomaidh na h-Alba.

"Chaidh an iomairt Thig a Theagaisg a stèidheachadh anns na 1990an airson daoine a thàladh gu teagaisg tro mheadhan na Gàidhlig. Thòisich sinn cuideachd a' coimhead ri am faigheamaid reachdas airson seasmhachd na Gàidhlig a dhìon.

"Gheall Ministear na Gàidhlig, Alasdair Moireasdan, gun deadh adhartas a dhèanamh a thaobh inbhe thèarainnte fhaighinn dhan Ghàidhlig.

"Ann an 2001 cho-dhùin Riaghaltas na h-Alba gun deadh Bòrd na Gàidhlig a stèidheachadh. Ann an 2002 chaidh a' chiad Plana Nàiseanta airson na Gàidhlig chun an Riaghaltais. Chaidh tòiseachadh a' coimhead ri molaidhean athaisgean Mhic a' Phearsain agus Mheek a chur an gnìomh.

"Ann an 2006 chaidh Bòrd na Gàidhlig a stèidheachadh".

Tha faisg air 100 neach air cruinneachadh aig Co-labhairt Chomunn na Gàidhlig.

Tha iad a' cluinntinn a-nise bho Ailean Caimbeul, an dàrna ceannard a bh' air a' bhuidhinn.

Thuirt esan gun robh "a h-uile ceum ann an leasachadh na Gàidhlig cudromach".