Tha suidheachadh na Gàidhlig ga dheasbad ann an Steòrnabhagh
'S e Comunn na Gàidhlig a chuir an tachartas air dòigh mar phàirt de na tha iad a' dèanamh gus 40 bliadhna den bhuidhinn a chomharrachadh
Tha fòcas gu sònraichte air Gàidhlig am measg na h-òigridh
Thuirt ceannard ChnaG nach deach ach an dàrna leth den mhodail 'son FtMG a chruthachadh, is gu bheil feum air sùil às ùr taobh a-muigh na sgoile
Tha CnaG ag iarraidh gun deadh lìonrath oifigearan coimhearsnachd a bhrosnaicheadh an òigridh a leudachadh gu mòr
Chosgadh seo suas ri £11m, thuirt iad
Ach thoiseach air a' cho-labhairt tha rabhadh air nochdadh às ùr mu staing na Gàidhlig aig ìre na coimhearsnachd
Tha daoine ann an Siabost ag ràdh gu bheil an suidheachadh a-nise nas miosa na bha e nuair a rinneadh rannsachadh ann an 2011 a thog draghan mòra mu chleachdadh na Gàidhlig
Aig an dearbh àm, tha Gàidheil òga ann an Glaschu air a bhith ag innse do BBC Naidheachdan gu bheil iadsan misneachail mun chànan sa bhaile
A' bruidhinn aig a' cho-labhairt, thuirt fear de sheann cheannardan ChnaG, John Angus MacAoidh, gu bheil feum às ùr air "miseanaraidhean" Gàidhlig dha na coimhearsnachdan
Chualas nas tràithe bhon Leas-Phrìomh Mhinistear, Ceit Fhoirbeis
"Tha sinn air dà bhuidhean-stiùiridh a stèidheachadh, agus tha sinn air bruidhinn ri daoine a tha an sàs anns na h-aon dùbhlain ann an cànanan eile.
"Ach feumaidh sinn a bhith faiceallach mus tog sinn modailean à dùthchannan eile nach bi freagarrach dhuinne. Ach tha e feumail a bhith a' bruidhinn riutha."
"Chan eil sinn ach air an dàrna leth dhen mhodail a chruthachadh. Tha foghlam foirmeil againn, agus cha bheag an goireas a tha siud. Mura bitheadh e bhiodh cùisean fada nas miosa. Ach tha taobh eile a' mhodail a dhìth, taobh muigh na sgoile dhan òigiridh, airson an cànan a tha iad ag ionnsachadh anns an sgoil a chleachdadh.
"Bidh an ro-ìnnleachd ag obair le clann eadar 3 agus 25 bliadhna a dh' aois".
"Carson a tha 40 bliadhna de FtMG air a bhitha againn 's na ceistean fileantachd a tha seo ann fhathast? Nach robh còir againn a bhith air coimhead ri Plana B ron seo? Tha feum air modail eile".
"Chan ann a' càineadh FTMG a tha sinn idir", tha Mgr MacNèill ag ràdh. "Chan ann ag iarraidh barrachd bho na sgoiltean a tha sinn, ach gu bheil barrachd a dhìth taobh a-muigh na sgoile. Bha rudan mar sin a' dol tro na bliadhnaichean, ach tha ceist an robh gu leòr.
"Chan e ro-ìnnleachd ChnaG a bhios an seo, bidh e air a tharraing bhon òigiridh agus bhon choimhearsnachd".
Nuair a thug CNAG fianais seachad air Bile nan Cananan Albannach, thuirt iad gur e targaid adhartach a bhiodh ann, a bhith ag amas air 90% de chloinne a' fagail foghlam tro mheadhan na Gaidhlig le fileantachd àbhaisteach aca.
"A dh'ionnsaigh Ro-ìnnleachd Nàiseanta Òigiridh Gàidhlig" - tiotal na h-òraid a tha Domhnall MacNeill a-nis a' toirt seachad. Tha e ag ràdh gur e "fileantachd àbhaisteach " a tha dhìth.
Tha e ag ràdh gu bheil Fileantachd, Misneachd is Miann a' dol còmhla. Chan fhaigh thu daoine fileanta mar a bi misneachd aca sa chànan agus miann aca a bruidhinn. Tha iad dà chànanach, 's chan eil e na iongnadh gum bi iad a' taghadh Beurla a bhruidhinn seach gur ann innte as misneachaile a tha iad.
Tha a' cho-labhairt gus tòiseachadh às ùr le òraid bho Dhòmhnall MacNèill.
Sin às dèidh do Dhòmhnall MacSuain a ràdh gu bheil e fhèin glè choltach ri Britney Spears. Fàgaidh sinn sin agaibh.
Tha Bìle nan Cànanan Albannach a' dol tro Phàrlamaid na h-Alba an-dràsta. Bha sinn ag aithris an t-seachdain seo air mar a tha Riaghaltas na h-Alba a' beachdachadh air am bile atharrachadh gus toirt air comhairlean Sgìrean Cànain Sònraichte ainmeachadh far a bheil a' Ghàidhlig aig co-dhiù 20% den t-sluagh.
A' bruidhinn ann an Steòrnabhagh an-diugh, tha Magaidh Wentworth bho Chomann nam Pàrant ag ràdh gu bheil tòrr chothroman an lùib a' bhile, gu h-àraidh taobh foghlaim.
Tòisichidh cùisean às ùr a dh'aithghearr is òraid gu bhith aig Dòmhnaill MacNèill.
San eadar-ama, tha Alasdair MacLeòid dìreach a bhith a' bruidhinn ri Coinneach Mòr.
Tanith Rothach
'S e dealbh eile a fhuair Annabel NicIllinnein is i a' bruidhinn ri daoine òga le Gàidhlig ann an Glaschu.
Tha Tanith Rothach am measg Ghàidheal òga an sin a tha misneachail mun Ghàidhlig. Ged a chaidh i tro FtMG ann am Port Rìgh bho thùs, 's ann bho chionn ghoirid a thuig i cho cudromach 's a tha an cànan dhi.
"Bha e mar epiphany agam, gun robh e cho sònraichte 's cho cudromach gun robh Gàidhlig agam," thuirt i ri BBC Naidheachdan.
Chualas draghan ùra nas tràithe mu chrìonadh na Gàidhlig an Siabost an Leòdhas.
Tha Dolaidh Joan NicIlleathain am measg nan daoine as sine sa bhaile far an do chuir i seachad a beatha.
A' coimhead air ais air na 14 bliadhna bho chaidh rannsachadh Shiaboist a dhèanamh, tha dealbh car dubhach aice:
"Air an t-sràid-sa, chan eil eil orra ach muinntir Beurla. 'S e glè bheag a th' air fhàgail againn," thuirt i, 's i a' bruidhinn air Gàidheil dhùthchasach na sgìre.
Dòmhnall Moireasdan
BBC Naidheachdan
"Fhad 's a tha daoine a' gabhail lòin an seo, tha iad a' bruidhinn am measg a chèile air cho feumail 's a tha e dhaibh a bhith a' tighinn còmhla mar seo. Tha iomadh bliadhna bho chaidh co-labhairt de a leithid air leasachadh na Gàidhlig a chur air chois, agus tha beachdan làidir ann gu bheil sin air a bhith na uireasbhaidh. Tha daoine a' faicinn buannachd mhòr ann a bhith a' tighinn cruinnn a bhruidhinn mu shuidheachadh a' chànain 's na tha ri dhèanamh.
"Agus tha am brot 's na ceapairean sònraichte math!"
"..ag iarraidh a' Ghàidhlig a chumail a' dol - ach 's e obair chruaidh a th' ann dha-rìribh" - shuidh Jonathan agus Calum Alasdair an t-sòfa againn airson innse dhuinn ciamar a tha iadsan a' faicinn suidheachadh na Gàidhlig.
Àm cudromach air fàire aig a' cho-labhairt - ach a bheil a leithid de rud ri ‘diathad an-asgaidh’ idir ann??
Tha am fear-naidheachd againn Alasdair MacLeòid air a bhith a' bruidhinn ri feadhainn a tha an làthair aig a' cho-labhairt.
Tha Catrìona NicIlleMhoire ag ràdh gur e madainn air leth a bh' ann is gu bheil feum air barrachd thachartasan mar seo.
Chuala sinn bho na sgoilearan seo ann an Àrd-sgoil MhicNeacail a tha làn misneachd mun Ghàidhlig.
Leis na buidhnean beaga aig a' cho-labhairt an-dràsta a' deasbad chùisean, tha cothrom againn cluinntinn bho Kayanna mu na dùbhlain a tha ro phàrantan nuair iad a' togail an cuid chloinne le Gàidhlig ann an dachaigh dà-chananach.
Tha a' cho-labhairt a-nis air briseadh na bhuidhnean beaga a thogail mholaidhean bho na tha an làthair. Tha oifigear bho ChnaG an lùib gach buidheann. Cha chluinn sinn na tha a' dol anns na buidhnean, agus cha bhi fiosrachadh sam bith ann air sin an-diugh.
Thèid na molaidhean 's na beachdan aca a chur air ais gu stiùirichean ChnaG.
Às dèidh seo bidh lòn ann is an uairsin tha dùil ri òraid bho Dhòmhnall MacNeill.
Bidh e a' bruidhinn air suiribhidh a rinn iad am measg òigridh agus a' bruidhinn air gu bheil structur ùr a dhìth airson leasachadh òigridh.
Dòmhnall Moireasdan
BBC Naidheachdan
"Cha robh mòran aig an Leas-Phrìomh Mhinistear ri ràdh. Thug i seachad òraid gu math goirid a' cur co-là bhreith sona air CnaG airson nan dà fhichead bliadhna. Ach cha do ghabh i an cothom càil susbainteach a ràdh. 'S e gun robh i an dòchas gun dèanadh Bile nan Cànanan Albannach feum cho faisg 's a chaidh i air dad a ràdh mu phoileasaidh no mu dheasbad na Gàidhlig"
Ceit Fhoirbeis: "Tha an dòigh sa bheil a' Ghàidhlig ga cleachdadh ann am beatha làitheil dhaoine an rud a tha daonnan ag atharrachadh".
Rinn i moladh air an obair a tha CnaG air a dhèanamh tro na bliadhnaichean, agus anns na bliadhnaichean mu dheireadh an seo am measg òigiridh.
"Tro Bhile nan Cànanan, le na Sgìrean Sonraichte Cànain, tha sinn airsin cothrom a thoirt do choimhearsnachdan".
Tha i ag ràdh gum bi CnaG gu mòr an sàs san deasbad a bhios ann.
Tha an Leas-Phrìomh Mhinistear a' bruidhinn a-nise tro cheangal bhideo.
