Fàs air Fèis Fiadh-bheatha nan Eilean

Bha riamh dlùth-cheangal eadar muinntir nan Eilean Siar is nàdar.

'S dòcha nach eil e na iongnadh mar sin gu bheil Fèis Fiadh-bheatha nan Eilean air fàs bho thòisich e ann an 2022 - is gu bheil dùil gun tèid a' choimhearsnachd fhèin an sàs ann barrachd is barrachd.

Tha fèis 2025 a' dol an-dràsta is clàr slàn ann gu Disathairne le tachartasan air an iomall gu deireadh na h-ath-mhìos.

​'S e fèis coimhearsnachd a th' ann fo stiùir Urras Glèidhteachais nan Seilleanan-mòra mar phàirt de Ghnèithean air an Oir.

Tha tòrr thachartasan air a bhith ann mar-thà bho chuairtean air tràighean, cuairtean ann an diofar sgìrean a' sireadh fiath-bheatha shònraichte, tursan-mara a' lorg mhucan-mara is leumadairean agus gu leòr eile.

Tha Shona NicIllFhialain, Oifigear Leasachaidh Comann Rìoghail Dìon nan Eun, mar phàirt mhòr den fhèis agus i air a bhith na lùib bhon a thòisich e.

Tha Shona NicIllFhialain na h-Oifigear Leasachaidh do Chomann Rìoghail Dìon nan Eun

"Tha Fèis Fiadh-bheatha nan Eilean air a bhith a' dol airson trì bliadhna a-nis agus 's e fèis gu math diofraichte a th' ann a chionn 's tha e a' dol tarsainn nan Eilean air fad bho Bharraigh suas gu Nis, agus tha tòrr diofar thachartasan againn thairis air aon seachdain," tha Shona ag ràdh.

"A' mhòr-chuid den ùine 's e rudeigin a thaobh nàdair a thathar a' bruidhinn air."

Bhon a thòisich an fhèis, tha na tachartasan a tha mar phàirt dhith air fàs agus faisg air 90 dhiubh ann am-bliadhna.

Tha na tachartasan air a bhith air feadh nan eilean agus air-loidhne.

Tha sin air cothrom a thoirt do dhaoine pàirt a ghabhail ann an diofar rudan gu h-ionadail.

"Air a' chiad bhliadhna a bh' againn, bha sinn ag amas air diofar dhaoine bho na h-eileanan air fad a bhith an sàs ann agus a bhith ag ionnsachadh mun nàdar a bha timcheall orra a chionn 's a' mhòr-chuid den ùine, bidh daoine a' dol seachad air rudan 's chan eil iad a' mothachadh dè a th' aca air an starsaich aca!"

"S mar sin, bha an fhèis gu mòr airson nan daoine anns na h-Eileanan an Iar a-mhàin an toiseach.

"Sin an t-amas a bh' againn, gum biodh daoine a' faighinn tlachd às an àrainneachd aca fhèin."

Cuairt ann am Barraigh a bha mar phàirt den Fhèis an-uiridh

Leis mar a tha an fhèis air fàs, tha na cuspairean air a bheil iad a' bruidhinn air leudachadh cuideachd - bho chuairtean a' lorg iolairean, sgrìob a' coimhead an traoin, cuairtean mara a' lorg dobhran, seiseannan air a bhith a' sgrìobhadh bàrdachd mu nàdar, bùithdean-obrach mu bhith a' togail deilbh agus iomadach rud, is beathach eile.

Le bliadhna eile den fhèis cha mhòr seachad, cò air a bheil iad ag amas airson nam bliadhnaichean a tha romhainn?

"Tha sinn an dòchas gum bi a' choimhearsnachd a' gabhail thairis air an fhèis agus gum bi iadsan pròiseil às 's gum bi iad airson a bhith an sàs ann," tha Shona ag ràdh.

"'S gum bi iad mar phàirt mhòr den fhèis 's gum faigh iad fhèin rudeigin às cuideachd."