Dachaigh-cùraim ga dùnadh rè ùine

Chaidh seirbheisean aig dachaigh-cùraim Strathburn House ann an Geàrrloch a stad rè ùine ri linn duilgheadasan le luchd-obrach fhastadh.

Thuirt NHS na Gàidhealtachd gu bheil iad a' sireadh àitichean-còmhnaidh ùra dhan t-seachdnar a tha a' fuireach san dachaigh-cùraim.

Thuirt iad gur e fuasgladh èiginneach a tha seo a dh' fheumadh a bhith air a chur an sàs rè ùine, a chionn 's gu bheil duilgheadasan fastaidh air draghan adhbharachadh mu shàbhailteachd luchd-còmhnaidh.

Thuirt am Bòrd Slàinte gu bheil iad air a bhith a' coimhead air fuasglaidhean eile, còmhla ri Comhairle na Gàidhealtachd, ach gun do dh'aontaich an dà bhuidhinn gu bheil seo riatanach ri linn an t-suidheachaidh.

Thuirt Àrd-Oifigear NHS na Gàidhealtachd airson Seirbheisean Coimhearsnachd, Pamela Cremin, gun obraicheadh iad còmhla ris a' choimhearsnachd ionadail gus beachdachadh air mar a bu chòir seirbheisean cùraim shòisealta do dh'inbhich a bhith air an lìbhrigeadh san sgìre san àm ri teachd.

Ach an-dràsta, thuirt i gur e seo an rud as sàbhailte do luchd-còmhnaidh san dachaigh-cùraim.