101 sgiobannan ag amas air Cuach na Cloinne 2025

Sgioba Sgoil Ghàidhlig Ghlaschu a' dèanamh gàirdeachais an dèidh dhaibh buannachadh an-uiridh

Tòisichidh co-fharpais ball-coise tro mheadhan na Gàidhlig do chloinn bun-sgoile bho air feadh Alba Dimàirt an ath-sheachdain.

Thòisich Cuach na Cloinne ann an 2006 agus thàinig fàs air a h-uile bliadhna.

Am-bliadhna, tha 101 sgiobannan de chòignear air an clàradh, le 680 duine cloinne a' gabhail pàirt ann.

'S e Comunn na Gàidhlig (CNAG) a tha gu ruith.

Tha Marina Mhoireach, Stiùiriche Leasachaidh ChNAG, ag ràdh gu bheil e na "adhbhar misneachd dhuinn gu bheil uimhir de sgoiltean agus òigridh" gu bhith a' farpais.

Thuirt i: " Tha e cho cudromach gu bheil clann a tha a' dol tro fhoghlam tro mheadhan na Gàidhlig a' faighinn chothroman a bhith a' cleachdadh a' chànain taobh a-muigh an t-seòmair-sgoile agus a bhith a' coinneachadh ri clann bho cheàrnaidhean eile aig a bheil a' Ghàidhlig."

Na geamannan roinneil dearbhaidh:

• 22/04 - Pàirce Uile Aimsir, Steòrnabhagh

• 23/04 - Sgoil Lìonacleit, Beinn na Fadhla

• 24/04 - Àrd-sgoil Loch Abar, An Gearasdan

• 30/04 - Àrd-sgoil Phort Rìgh, An t-Eilean Sgitheanach

• 06/05 - Pàirce Chanal, Inbhir Nis

• 07/05 - Goals, Rathad Mòr an Iar, Glaschu

Thèid a' chuairt-dheireannach a chluich 4mh den Ògmhios ann an Inbhir Nis.

Ann an 2024 b' e Sgoil Ghàidhlig Ghlaschu a thog an Cupa airson an dàrna bliadhna ann an sreath.

Tha Cuach na Cloinne 2025 air a mhaoineachadh le Bòrd na Gàidhlig, Comhairle nan Eilean Siar agus Comhairle na Gàidhealtachd.