Glaschu 850

'S e bliadhna mhòr a th' ann an 2025 do Ghlaschu agus am baile a' comharrachadh 850 bliadhna bho chaidh a stèidheachadh.

B' e càirt rìoghail ann an 1175 a thug cead 'son inbhe baile a bhuileachadh air Glaschu is a dh'fhàg gun do dh'fhàs e mar àite a bha glè chudromach gu h-eaconamach.

Tha tachartasan air a bhith a' leantainn fad na bliadhna gus a' chlach-mhìle a chomharrachadh.

Chaidh cuirm mhòr a chumail aig Celtic Connections; chaidh cèilidh sràide a chur air dòigh ann am meadhan a' bhaile; bha cothroman ann ionnsachadh mu eachdraidh Ghlaschu; agus chaidh tachartasan bliadhnail leithid Piping Live a leudachadh gu sgìrean eile. Is chan eil an sin ach pàirt de na th' air a bhith a' dol.

Sealladh à Glaschu aig toiseach nan 1970an is na crainn mhòra air Chluaidh àrd os cionn a' bhaile

Tha BBC Naidheachdan gu bhith a' comharrachadh ceann-bliadhna Baile Mòr nan Gàidheal le prògram sònraichte feasgar Dihaoine.

Bidh Aithris an Fheasgair shònraichte beò fad uair a thìde bho 5f ri taobh sealladh cho ainmeil 's a th' ann an Glaschu - Abhainn Chluaidh.

Tha an abhainn aig cridhe sgeulachd a' bhaile. 'S i a thug fàs do ghnìomhachas gàrraidhean-iarainn Ghlaschu, a bh' aig teis-mheadhan fàis eaconamaich. Agus ged a tha an gnìomhachas sin air atharrachadh gu mòr thar nam bliadhnaichean, tha an abhainn fhathast mar phàirt mhòr de dhearbh-aithne Ghlaschu agus bidh i aig cridhe na strì an aghaidh atharrachadh na gnàth-shìde.

A thuilleadh air Aithris an Fheasgair, bidh sinn cuideachd a' coimhead air suidheachadh Ghlaschu air An Là - eadar Diardaoin agus Disathairne - agus an seo fhèin air làrach BBC Naidheachdan.

Bidh sinn a' toirt sùil air ais air eachdraidh a' bhaile.

Cluinnidh sinn mar a chaidh a stèidheachadh; mar a dh'fhàs na gàrraidhean-iarainn; mar a tha cruth a' bhaile air atharrachadh, agus mu eachdraidh a' bhuill-choise.

Ach bheir sinn cuideachd sùil air adhart agus nì sinn beagan meòrachaidh air na dh'fhaodadh a bhith san amharc.

Cluinnidh sinn mu na h-atharraichean a tha air fàire a thaobh bun-structair; cothroman a tha ri fhaotainn ann an saoghal a' chiùil, agus na tha san amharc a thaobh Foghlam tro Mheadhan na Gàidhlig, a chaidh a stèidheachadh ann an Glaschu bho chionn 40 bliadhna.

Gheibh sinn beachd bho Ghàidheil òga an Glaschu

Bidh aoighean còmhla rinn 's iad a' toirt seachad am beachd air a' bhaile, na rudan a tha tarraingeach mu dhèidhinn agus na cothroman a tha a' tighinn an lùib a bhith a' fuireach ann.

Ach mar bhaile mòr sam bith, tha trioblaidean gu leòr a' leanntainn ann an Glaschu agus bithear a' beachdachadh air na leasachaidhean a bu mhath leotha fhaicinn gus am baile a ghluasad air adhart.

Cluinnidh sinn anns a' phrògram shònraichte cuideachd mu na tha sgoilearan Bun-sgoil Bhaile a' Ghobhainn a' smaoineachadh a tha an dàn do Ghlaschu ann an 850 bliadhna eile.

Chan fhaic duine againn an là sin ach cò aig a tha fios - 's dòcha gun tèid a lorg ann an tasglann a' BhBC aon là agus gun toir na beachdan a nochd aig comharrachadh 850 gàire air ròbot air choireigin a bhios a' fuireach ann an Glaschu.