"Tha a h-uile duine a' smaoineachadh air Coinneach is an GG còmhla ri chèile"
- Air fhoillseachadh
Tha deagh chuimhne aig Coinneach MacThòmais air a' chiad turas a stiùir e còisir - agus na thuirt a mhàthair ris às dèidh làimh.
Ged a smaoinicheas a h-uile duine an-diugh air Ceòlraidh Ghàidhlig Ghlaschu nuair a chluinneas iad ainm Choinnich, bha e aig an àm sin os cionn Coisir Cille Bhrìghde an Ear.
"Bha mo mhàthair san audience agus thuirt i 'your face was grey'," tha Coinneach a' cuimhneachadh le gàire.
"Na nerves! Agus tha na nerves ann fhathast, ach tha mi a' smaoineachadh nach eil m' aodann grey a-nise. 'S dòcha dearg."
Chan eil adhbhar sam bith aodann dearg a bhith air Coinneach às dèidh na tha e air coileanadh anns na bliadhnaichean mòra - 41, creid no nach creid - a tha e air a bhith e aig stiùir Ceòlraidh Ghàidhlig Ghlaschu, no an GG mar a b' fheàrr a dh'aithnichear iad.
San àm sin tha a' chòisir air farpais Sgiath MhicShìmidh agus Thulaich Bhàrdainn a bhuannachadh sia tursan, an turas mu dheireadh bho chionn deich bliadhna ann an Inbhir Nis.
A thuilleadh air sin, tha Coinneach a' dèanamh dheth gu bheil iad air a bhith san dàrna àite còrr is 20 turas - am measg sin na trì bliadhna mu dheireadh a bha an fharpais ann - le Còisir an Òbain a' dèanamh a' ghnothaich orra gach turas.
Tha a h-uile Mòd cudromach ann am beatha còisir - ach tha am fear seo gu sònraichte cudromach dhan GG agus Coinneach air co-dhùnadh gur e seo a' bhliadhna mu dheireadh aige gan stiùireadh.
'S aithne dhan fheadhainn a tha air a bhith a' seinn sa chòisir tro na bliadhnaichean glè mhath carson dìreach a tha iad air a bhith cho soirbheachail.
"Tha e spòrsail, tha e foighidinneach, tha e cruthachail 'son a bhith a' dèanamh co-sheirm," dh'innis Catrìona NicRath, ceann-suidhe na còisir.
"Tha mi a' smaoineachadh gu bheil uallach na còisir mar phàirt mhòr dha bheatha.
"Tha mi a' creids' leis a' chuid as motha againn a tha air a bhith ann 'son iomadh bliadhna, chanadh sinn gur e fìor charaid a th' ann.
"Tha mi a' smaoineachadh gu bheil e gu math duilich sgaradh a dhèanamh eadar Coinneach agus an GG leis cho fada 's a tha e air a bhith os cionn na còisir - tha a h-uile duine a' smaoineachadh air Coinneach is GG còmhla ri chèile.
"Ach tha mi a' smaoineachadh gur e rud mòr a th' ann, an seòrsa duine a th' ann an Coinneach, tha e a' cur fàilte air a h-uile duine chun na còisir is tha e a' dèanamh cinnteach gu bheil daoine a' faireachdainn mar phàirt dheth.
"Tha a h-uile duine a' faireachdainn mar phàirt den teaghlach".
Bha an spiorad sin fìor chudromach do Choinneach fhèin nuair a chaill e a bhean Valerie.
"Bha a' chòisir mar theaghlach mòr mun cuairt orm," tha e ag ràdh, is gu dearbh tha grunnan a tha càirdeach dha air seinn anns an GG thar nam bliadhnaichean.
Carson a rèiste a tha e air co-dhùnadh obair an stiùiriche a leigeil seachad agus ceum air ais a ghabhail bhon bhuidhinn?
"Tha mi a' faireachdainn gur e seo an t-àm ceart," tha Coinneach ag ràdh.
"Bha ceann-là mòr agam bho chionn ghoirid. Tha mi a-nise 75 - deich bliadhna seachad air aois retiral!
"Tha an t-àm a-nise ceart 'son cuideigin eile a' chòisir a thoirt air adhart agus tha mi ag iarraidh stad nuair a tha mi slàn gu leòr."
Am measg a h-uile dad eile, tha aon rud nach bi Coinneach ag ionndrainn: an dùbhlan mòr a bhios roimhe a h-uile Sultain taghadh cò an 35 duine a bhios a' seinn ann am farpais Sgiath MhicShìmidh agus Thulaich Bhàrdainn.
Tha e air an taghadh sin a dhèanamh 'son Mòd an Òbain agus cha bhi aige ri dhèanamh tuilleadh.
Eil uallach a bharrachd saoil air an fheadhainn sin a thagh e gus dèanamh cinnteach gun soirbhich leis aig a' Mhòd mu dheireadh aige san dreuchd?
"Tha mi a' smaoineachadh gur e an rud as cudromaiche a th' ann gun dèan sinn cho math 's a ghabhas a bhith, gun cuir sinn air performance dha," thuirt Catrìona.
"Ma bhios esan toilichte leis mar a sheinn sinn 's e sin an rud a tha a' cunntadh dhuinn, ach tha mi glè chinnteach gum bi deòir ann fad an là."
Agus ciamar a bhios Coinneach fhein a' faireachdainn? Cha bhi aodann glas co-dhiù.
"Beagan nearbhasach. Beagan brònach. Ach tha mi cinnteach gu bheil a' chòisir a-nise nas fheàrr na bha a-riamh san 41 bliadhna.
"An-diugh tha sinn a' dèanamh co-sheirm uabhasach doirbh - ach chì sinn dè thachras."