£170,000 air a thogail bho ionadan-pàircidh an Eilein Sgitheanaich

Thog Comhairle na Gàidhealtachd £170,000 (às dèidh chosgaisean) thairis air a' bhliadhna bho na h-ionadan-pàircidh air feadh an Eilein Sgitheanaich agus Ratharsair.

Thèid an t-airgead sin a chur ri buidseat Comataidh Sgìreil an Eilein Sgitheanaich agus Ratharsair.

Thuirt Cathraiche na Comataidh, Iain MacFhionnlaigh, gu bheil an t-ionmhas a thathas a' togail a' sìor èirigh.

"Tha sin foilleasach le na h-àireamhan de luchd-turais ag èirigh bliadhna às dèidh bliadhna.

"Tha an 50% de theachd a-steach, às dèidh chosgaisean, cudromach ann a bhith a' cumail taic ri pròiseactan air feadh na sgìre.

"Aig an ìre-sa, cumaidh sinn oirnn ag obair le oifigearan bho sheirbheisean eadar-dhealaichte agus coimhearsnachdan ionadail 'son a dhèanamh cinnteach gun tèid an t-ionmhas a chosg ann an dòigh a tha a' cur ri feumalachdan na coimhearsnachdan againn," thuirt e.

Thug a' chomataidh taing dha na oifigearan a tha a' coimhead às dèidh nan ionadan-pàircidh agus luchd-obrach eile a tha an sàs ann a bhith a' cumail smachd air trafaig agus ag obair a dh'ionnsaigh àitichean-pàircidh nas fhèarr.