Eachdraidh iongantach nan còisirean an Earra-Ghàidheal is "sing off" Mòd 1893
- Air fhoillseachadh
Tha sinn air Diciadain a' Mhòid a ruighinn is chan fhada a-nise gus am bi aire air na còisirean.
Ach tha dualchas beartach nan còisirean Gàidhlig ann an Earra-Ghàidheal gu sònraichte mar-thà air a bhith fon phrosbaig san Òban anns na seachdainean mu dheireadh.
'S iad a' bhuidheann Oban Heritage Hunters, taobh a-muigh a tha air cùl Taisbeanadh Chòisirean Earra-Ghàidheal ann an Ionad Achadh na Creige sa bhaile is Eleanor NicFhionghain os a chionn.
Tha iad a' dèanamh dheth gu bheil timcheall air 20 còisir Ghàidhlig air a bhith ann an Earra-Ghàidheal san 60 bliadhna mu dheireadh.
'S i Còisir an Òbain an tè as sine is i a' dol air ais gu 1892 - a' bhliadhna a bha a' chiad Mhòd ann.
Tha dealbh den chòisir ann an 1895 am measg nan dealbhan a tha a' nochdadh san taisbeanadh.
Agus 's iomadh dealbh sin - mòran à stòras Tìm an Òbain - agus cuideachd seann bhideothan bho thasglan a' BhBC.
Tha cuideachd fiolm goirid a rinn Anna Garvin às an Òban a tha ag amas air blas a thoirt do dhaoine air cò ris a tha e coltach a bhith ann an còisir Ghàidhlig.
Tha cuid de sgeulachdan àraid air tighinn am bàrr fhad 's a bha a' bhuidheann ag ullachadh an taisbeanaidh.
Nam measg tha rud a thachair aig Mòd 1893 - is air a bheil a' bhuidheann fhèin a' gabhail 'sing off'.
Fhuair iad aithris pàipear-naidheachd a dh'innis gun robh ceithir còisirean "cho faisg is gun robh feum air deuchainnean eile".
"Chaidh seo a dhèanamh le dà chòisir a bhith air an àrd-urlar aig an aon àm, a' gabhail rannan mu seach às an aon òran".
Às dèidh ùine mòire is deasbaid fhada co-dhùin na britheamhan gur e Còisir an Naoimh Colm Cille à Glaschu a bha sa chiad àite, an t-Òban san dàrna àite is Còisir Bhaile a' Chaolais san treas àite.
Bha am Mòd fada air thoiseach air Sìm Cowell is eile, a rèir choltais.
"Thuig a' bhuidheann againn gun robh stòras prìseil againn de dhealbhan is eile is chuir sinn romhainn an taisbeanadh seo a chur air dòigh", thuirt Eleanor NicFhionghain.
"Tha sinn an dòchas gun tòisich seo còmhradh is gum piobraich e cuimhne dhaoine mu eachdraidh iongantach nan còisirean Gàidhlig an Earra-Ghàidheal.
"Tha sinn cho taingeil do Thìm an Òbain agus do dhaoine sa choimhearsnachd a tha air dealbhan is gnothaichean eile a thoirt dhuinn.
"'S e seo an dòigh againn air fàilte a chur air a' Mhòd dhan Òban uair eile agus 's e rud sònraichte dha-rìribh a th' ann dhuinn ar dualchas a thaisbeanadh do luchd-tadhail".
Bidh an taisbeanadh ann an Ionad Achadh na Creige gu deireadh na mìos.
Ged nach eil dùil ri 'sing off' gus co-dhùnadh cò na còisirean a shoirbhicheas aig Mòd 2024.