Taghadh: Ìmpidh air an ath BhP do na h-Eileanan Siar dèiligeadh ri bochdainn connaidh

Tha muinntir nan Eilean Siar a' fulang na h-ìre as àirde de bhochdainn chonnaidh san Rìoghachd Aonaichte air fad, a rèir sreath sgrùdaidhean.

Tha bochdainn connaidh a' ciallachadh gu bheil daoine a' cosg còrr agus 10% de theachd a-steach dachaigh air teasachadh an taighe

Ma tha iad ann am fìor bhochdainn connaidh feumaidh iad 20% den teachd a-steach aca a chosg airson iad fhèin a chumail blàth agus fallain.

Tha grunn diofar bhuidhnean an sàs san obair cùisean a leasachadh dhaibhsan ann an cruaidh-chàs agus 's e gnìomh agus gluasad air a' chuspair tha iad a' sireadh bhon ath riaghaltas agus riochdaire aca ann an Westminster.

Tha Ciorstaidh NicLeòid ag ràdh g' eil barrachd dhaoine a' tighinn thuca airson taic le teasachadh

Tha rannsachadh a rinn a' bhuidheann taigheadais, Tighean Innse Gall, a' tomhas gu bheil 57% de dhachaighean sna h-Eileanan a' fulang bochdainn connaidh, le 44% a' fulang fìor bhochdainn connaidh.

Tha 12 bliadhna on thòisich Ciorstaidh NicLeòid ag obair dhaibh agus tha i ag ràdh gu bheil barrachd is barrachd dhaoine a' tighinn thuca a' sireadh cuideachaidh.

Dh'innis tòrr aca gum bi iad tric a' dol às aonais teas buileach a-staigh leis cho doirbh 's a tha e dhaibh pàigheadh airson an cosgaisean cumhachd.

Thuirt i gun cuireadh iad an taic ri taraif shòisealta neo faochadh do dhaoine a tha a' strì le an cosgaisean cumhachd cho fada 's a bhiodh sgeama sam bith cothromach do dhaoine air feadh na Rìoghachd Aonaichte.

"Airson an aon ìre de theas fhaighinn ri taigh sa bheil gas feumaidh sinn trì tursan a bharrachd dealain a chleachdadh. Rud a gheibh iadsan airson £200 bidh e suas ri £500 dhuinne.

"Tha sinn a' cleachdadh fada a bharrachd dealain na daoine air tìr-mòr. Dèanamh cothromach e dhan a h-uile duine eadar a bheil thu ann an eilean neo air tìr-mòr gu bheil an rud a tha thu a' pàigheadh airson an dealain gu bheil teas a' tighinn air ais dhan taigh," thuirt i.

Tha bochdainn connaidh na "chùis èiginn", am beachd Ghòrdain MhicMhathain

Fhuair rannsachadh a rinn Urras Coimhearsnachd Horsiadair air cor an luchd-còmhnaidh ann an Siabast bho Dheas, Dail Beag agus Dail Mòr gu bheil faisg air 60% den t-sluagh am bochdainn connaidh.

Tha Gòrdan MacMhathainn na mhanadsair eadar-amail air a' bhuidhinn a tha a' cleachdadh teachd a-steach bhon chrann-ghaoithe air leasachadh ionadail.

'S e a dh'iarradh esan bhon ath riaghaltas ann an Lunnainn atharrachadh air poileasaidhean cumhachd.

"Feumaidh ceangal a bhith ann eadar na tha e a' cosg dealan a dhèanamh agus na tha dachaighean a' cosg air cumhachd airson margaidh a stèidheachadh a tha nas cothromaiche do dhaoine a tha nas fhaisge air far a bheilear a' cruthachadh cumhachd.

"'S e ceum mòr air adhart a bhiodh ann.

"Tha seo na chùis èiginn; feumaidh sinn fuasgladh fhaighinn cho luath 's a ghabhas," thuirt Mgr MacMhathain.

Dh'iarr Aonghas MacCarmaig atharrachadh air poileasaidhean riaghlachaidh

'S e crathadh a thoirt air riaghlachadh na margaidh cumhachd a tha a dhìth, a rèir Aonghais MhicCarmaig, Cathraiche Buidheann-ghnìomha an Aghaidh Bhochdainn sna h-Eileanan Siar.

"An-dràsta tha tuathan-gaoithe coimhearsnachd sna h-Eileanan an Iar a' cruthachadh barrachd dealain na tha a dhìth air muinntir na sgìre.

"Mar a tha cùisean an-dràsta, feumaidh sinn an dealan sin a chur gu tìr-mòr agus a cheannach air ais air prìs nas àirde.

"Cha bu chòir dhan dealan a bhith nas saoire ann an Lunnainn neo Glaschu na gheibh sinn ann an seo

"Chan eil ciall ann. Bu chòir dhan a h-uile duine an aon phrìs a phàigheadh.

"Feumar fuasgladh fhaighinn dhan sin, agus 's ann mu dheidhinn mar a tha a' mhargaidh ga riaghlachadh a tha a h-uile càil," thuirt e.

Tha teachdaireachd nam buidhnean-taice soilleir.

Ge b' i cò an riaghaltas ùr a bhios ann an Westminster, agus ge b' i cò an riochdaire a bhios aca ann, 's e prìsean cumhachd nas cothromaiche do mhuinntir nan Eilean Siar a thathar ag iarraidh bhuapa.