Apêl am dystion wedi gwrthdrawiad A5 ger Cerrigydrudion

Mae tri o bobl wedi cael eu hanafu yn dilyn gwrthdrawiad rhwng dau gerbyd ar yr A5 yng Nglasfryn ger Cerrigydrudion.

Cafodd un o'r tri eu cludo i Ysbyty Stoke mewn hofrennydd, tra bod dau berson arall wedi eu cludo i Ysbyty Glan Clwyd mewn ambiwlans.

Digwyddodd y gwrthdrawiad rhwng car Ford Mondeo a fan Volkswagen am 09:20 fore Mercher. Bu'r ffordd ar gau am rai oriau, ond mae bellach wedi ail-agor.

Mae Heddlu Gogledd Cymru yn cynnal ymchwiliad, ac yn apelio ar i unrhyw dystion i gysylltu â nhw.