Balchder Côr Meibion Hoyw De Cymru

Côr Meibion Hoyw De Cymru yn ymarfer yng Nghaerdydd

Mae Côr Meibion Hoyw De Cymru yn 10 oed eleni.

Syniad Andy Bulleyment, yr arweinydd, oedd sefydlu'r côr i ddechrau "oherwydd fod gan bob dinas arall gôr hoyw!"

Mae wedi tyfu o rhyw 15 aelod yn wreiddiol i 40 aelod bellach ac yn mynd o nerth i nerth, a bob amser yn croesawu aelodau newydd.

Er mai yng Nghaerdydd mae'r côr yn ymarfer, mae aelodau yn teithio mor bell ag Abertawe a Chas-gwent i ddod i'r ymarferion.

Bydd y côr yn cymryd rhan ym mhenwythnos Pride Cymru yng Nghaerdydd dros benwythnos gŵyl y banc ac yn perfformio ar y prif lwyfan ar y prynhawn Sadwrn.

Fis Awst nesa', bydd gŵyl gorawl LHDT Hand in Hand yn cael ei chynnal yng Nghaerdydd, a hynny am y tro cyntaf. Bydd digwyddiadau yn cael eu cynnal yn Neuadd Dewi Sant, Canolfan y Mileniwm, y Senedd a nifer o leoliadau eraill ar draws Caerdydd, felly mae yna lawer o waith paratoi o'u blaenau!