Everton yn datgelu 'mainc sgwrsio' er cof am Gary Speed
- Cyhoeddwyd
Mae Clwb Pêl-droed Everton wedi datgelu "mainc sgwrsio" er cof am Gary Speed tu allan i'w stadiwm.
Mae meinciau sgwrsio yn llefydd i gefnogwyr siarad am iechyd meddwl gyda'r gobaith y bydden nhw'n annog pobl i sgwrsio am eu teimladau, meddai'r clwb.
Daw'r cyhoeddiad 14 mlynedd ers marwolaeth Speed, gyda'i deulu yn ymweld â'r fainc cyn y gêm yn erbyn Newcastle ddydd Sadwrn.
Dywedodd llefarydd ar ran Clwb Pêl-droed Everton bod y fainc yn "deyrnged barhaol i un o gyn-chwaraewyr y clwb sydd yn cael ei edmygu fwyaf."
Chwaraeodd Speed i'r Toffees am ddwy flynedd, yn sgorio 18 gôl mewn 65 gêm i'r clwb.
Cafodd Gary Speed ei ddarganfod yn farw yn ei gartref ym mis Tachwedd 2011.
Yn cyn-gapten Cymru, Speed oedd rheolwr y tîm cenedlaethol ar y pryd.
Chwaraeodd Speed i'r Toffees am ddwy flynedd, yn sgorio 18 gôl mewn 65 gêm i'r clwb.
Mae'r fainc cynnwys y neges 'Er cof am Gary Speed, Evertonian, Capten, Arweinydd. 1969-2011. Lle ar gyfer yr hyn sydd yn aml ddim yn cael ei ddweud. Lle i eistedd, rhannu a gwrando.'
Mae wedi ei leoli ar blaza'r cefnogwyr, gyda staff o gwmpas cyn y gemau i siarad â chefnogwyr am iechyd meddwl, ac i roi cefnogaeth os oes angen.
Fe wnaeth teulu Gary Speed ymweld â'r fainc cyn gêm Everton dydd Sadwrn
Dywedodd Neville Southall, un o gewri Everton ac un o gyn cyd-chwaraewyr Gary gydag Everton a Chymru bod y fainc yn "addas iawn."
"Fyddech chi byth yn cysylltu Gary â mainc, oherwydd roedd yn ymddangos bod ganddo bob dim, ond mewn sawl ffordd mae'n addas iawn," meddai.
"Os ydych chi'n eistedd yno ac yn meddwl bod bywyd pawb arall yn berffaith, gallwch chi feddwl am ddyn a oedd yn bêl-droediwr gwych ac yn rheolwr gwych - ond roedd gyda'i broblemau ei hun."
Fforwm Cefnogwyr Everton a wnaeth gynnig creu mainc er cof Gary.
"Roedden ni eisiau cofio Gary Speed, a gobeithiwn y bydd y fainc hon yn dod yn waddol parhaol," meddai Dave Wycherley, Is-gadeirydd Fforwm Cefnogwyr Everton.
"Mae problemau'n teimlo'n ysgafnach pan maen nhw'n cael eu rhannu, ac mae Everton bob amser wedi bod yn glwb lle mae cefnogwyr yn cymysgu, yn siarad, ac yn dianc rhag pwysau bywyd am ychydig.
"Mae pêl-droed yn dangos cymuned ar ei gorau, ac mae bod yn yr awyr agored yn helpu'r sgyrsiau hynny i ddod yn naturiol."
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.