24 mlynedd o garchar am drywanu dyn 21 oed i farwolaeth

Clywodd y llys fod Momodoulamin Saine wedi tynnu cyllell o'i boced yn ddirybudd cyn trywanu Asim Khan

Mae dyn o Gaerdydd wedi cael ei ddedfrydu i 24 mlynedd o garchar am drywanu dyn 21 oed i farwolaeth yn y ddinas wedi ffrae tu allan i fwyty McDonald's dros wydryn o Jack Daniels a Coke.

Roedd Momodoulamin Saine, 28 oed ac o Drelái, yn honni ei fod yn amddiffyn ei hun pan ymosododd ar Asim Khan, ond fe benderfynodd rheithgor yn Llys y Goron Casnewydd ei fod yn euog o lofruddiaeth.

Dechreuodd y ffrae wedi i frawd Mr Khan, Hamza, yn ddamweiniol, arllwys diod gwerth £6.50 yr oedd Saine wedi ei adael ar y llawr mewn man ysmygu tu allan i glwb nos Soda yng nghanol y ddinas.

Cafodd Mr Khan, o ardal Grangetown, ei drywanu ddwywaith yn ei stumog yn yr oriau mân ddydd Sul 21 Gorffennaf a bu farw o'i anafiadau yn yr ysbyty.

Wrth ddedfrydu Saine, dywedodd y Barnwr Mr Ustus Martin Griffiths fod y rheswm dros y ffrae "yn bitw" a "chwerthinllyd".

Dywedodd Hamza Khan: "Bu farw yn fy mreichiau. Bydd y sioc gyda fi weddill fy oes."

Dywedodd mam Asim Khan bod y boen ers ei farwolaeth yn "annioddefol"

Clywodd y llys fod y diffynnydd wedi gadael y clwb nos wedi i'r ddiod gael ei arllwys, a bod y brodyr wedi aros yno tan 04:00 cyn gadael i chwilio am fwyd.

Roedden nhw tu allan i'r bwyty yn Heol Eglwys Fair pan gymrodd Saine un o'u diodydd a cherdded i ffwrdd.

Aeth y brodyr ar ei ôl ac fe daflodd Saine y ddiod atyn nhw. Taflodd Asim Khan ddiod ei hun ato. Yn y ffrwgwd dilynol, cafodd Saine ei gicio i'r llawr. Tynnodd gyllell yn annisgwyl o'i boced gan drywanu Asim Khan.

Gwelodd y rheithgor luniau CCTV'n dangos Asim Khan yn cwympo i'r llawr ychydig cyn 05:00. Cafodd driniaeth gan barafeddygon ond daeth cadarnhad yr yr ysbyty ei fod wedi marw.

Swyddogion heddlu'n cynnal ymchwiliad i'r achos yn Heol Eglwys Fair

Dywedodd ei fam mewn datganiad i'r llys fod hi a'i theulu "mewn poen annioddefol" ers noson y farwolaeth.

"Rydym wedi ein llorio ers hynny," meddai. "Bod diwrnod rydym yn galaru colli Asim. Ni allwch ddychmygu poen a thorcalon gwaeth."

Dywedodd y barnwr bod arllwys y ddiod "yn ddigwyddiad pitw" ac yn rhywbeth "chwerthinllyd" i gwyno yn ei gylch.

Ychwanegodd fod Saine wedi sarhau'r brodyr ar sail hil cyn trywanu Asim Khan.

Dywedodd arweinydd yr ymchwiliad i'r achos, y Ditectif Prifarolygydd Mark O'Shea o Heddlu De Cymru fod Asim Khan "yn ddyn ifanc llawn potensial".

"Yr hyn a ddaeth i'r amlwg gydol yr ymchwiliad a'r achos oedd fod Saine yn unigolyn treisgar, peryglus oedd â chyllell ar strydoedd Caerdydd."

Cafodd Hamza Khan, 25 oed ac hefyd o Grangetown, ei gael yn euog o achosi niwed corfforol difrifol am gicio Saine tra roedd ar y llawr. Bydd yn cael ei ddedfrydu'n ddiweddarach.