Cyhoeddi enw'r dyn a gafodd ei drywanu yng Nghaerdydd

Mae teulu Asim Khan yn cael cefnogaeth gan swyddogion arbenigol

Mae Heddlu De Cymru wedi cyhoeddi enw dyn 21 oed a gafodd ei drywanu yn ystod oriau mân fore Sul yng nghanol Caerdydd.

Roedd Asim Khan yn dod o Grangetown a bu farw yn Ysbyty Athrofaol Cymru.

Cafodd Heddlu'r De eu galw i Heol Eglwys Fair oddeutu 04:50 fore Sul wedi adroddiad o ymosodiad.

Mae dyn lleol 27 oed wedi cael ei arestio mewn cysylltiad â'r digwyddiad ac ar hyn o bryd yn cael ei holi yng ngorsaf yr heddlu ym Mae Caerdydd.

Mae teulu Mr Khan yn cael eu cefnogi gan swyddogion arbenigol.

Dywedodd y Ditectif Uwcharolygydd Richard Jones: "Mae dyn ifanc wedi colli ei fywyd mewn modd drasig.

"Mae lluniau camerâu cylch cyfyng yn dangos bod ffrwgwd wedi dechrau ger McDonald's a symud tuag at siop Oxfam - yn y fan honno fe gwympodd y dyn wedi iddo gael ei drywanu."

Mae ymchwiliadau'r heddlu yn parhau.

Mae'r ymchwiliad ar Heol Eglwys Fair yn parhau

Roedd presenoldeb yr heddlu yng nghanol y brifddinas yn amlwg ddydd Sul