Pa lyfrau sydd ar restr fer gwobrau Tir na n-Og?

Y llyfrau sydd wedi cyrraedd rhestr fer eleni

Mae Cyngor Llyfrau Cymru wedi cyhoeddi'r rhestr fer Gymraeg ar gyfer gwobrau llyfrau Tir na n-Og 2025.

Dywedodd y Cyngor Llyfrau bod y gwobrau yn "dathlu dawn a chreadigrwydd awduron a darlunwyr" sy'n creu gweithiau gwreiddiol yn Gymraeg.

Gwobrau Tir na n-Og yw'r gwobrau hynaf ar gyfer llenyddiaeth plant a phobl ifanc yng Nghymru.

Mae gan y wobr Gymraeg ddau gategori - ar gyfer oedran cynradd ac oedran uwchradd.

Rhestr fer cynradd

• Ni a Nhw gan Sioned Wyn Roberts, darluniwyd gan Eric Heyman (Atebol)

• Arwana Swtan a'r Sgodyn Od gan Angie Roberts a Dyfan Roberts, darluniwyd gan Efa Dyfan (Gwasg y Bwthyn)

• Llanddafad gan Gareth Evans-Jones, darluniwyd gan Lleucu Gwenllian (Y Lolfa)

Rhestr fer uwchradd

• Cynefin, Cymru a'r Byd gan Dafydd Watcyn Williams (Gwasg Carreg Gwalch)

• Rhedyn, Merlyn y Mawn gan Myrddin ap Dafydd (Gwasg Carreg Gwalch)

• Cymry. Balch. Ifanc gan awduron amrywiol. Golygwyd gan Llŷr Titus a Megan Angharad Hunter, darluniwyd gan Mari Philips (Rily)

Y tri llyfr sydd wedi cyrraedd y rhestr fer uwchradd

Y beirniaid ar y panel ar gyfer y llyfrau Cymraeg eleni oedd Sioned Dafydd, Rhys Dilwyn Jenkins a Lleucu Non.

Dywedodd Sioned Dafydd, Cadeirydd y panel Cymraeg: "Cyflwynwyd casgliad hyfryd o lyfrau i blant a phobl ifanc yn y ddau gategori Cymraeg eto eleni – llyfrau sydd yn darparu drych pwysig i blant a phobl ifanc Cymru yn eu holl amrywiaeth.

"Gobeithiwn y bydd plant yn gallu adnabod eu hunain wrth uniaethu gyda rhai o'r cymeriadau a'r awduron, ac o ganlyniad bod darllen llenyddiaeth plant yn llawer mwy na thasg gwaith cartref."

Bydd yr enillwyr yn cael eu cyhoeddi yn yr haf.