Pride Cymru'n dathlu mwy o Gymraeg nac erioed eleni
Fe wnaeth filoedd o bobl ymgynnull ger Gwesty'r Angel i ddechrau ar yr orymdaith dwy filltir o amgylch canol y ddinas, gan orffen wrth y Castell
- Cyhoeddwyd
Eleni bydd Pride Cymru'n dathlu 40 mlynedd ers yr orymdaith hawliau hoywon gyntaf yng Nghaerdydd nôl yn 1985.
Fore Sadwrn fe wnaeth filoedd o bobl ymgynnull ger Gwesty'r Angel i ddechrau ar yr orymdaith dwy filltir o amgylch canol y ddinas, gan orffen wrth y Castell.
Aelodau'r gymuned traws sy'n arwain gorymdaith yr ŵyl LHDTC+ mwyaf yng Nghymru, er mwyn gwneud safiad yn erbyn dyfarniad diweddar y Goruchaf Lys dros ddiffiniad menyw.
Mae'r adloniant a'r dathliadau yn parhau drwy gydol y penwythnos yng Nghae Cooper ym Mharc Bute, fydd yn cynnwys perfformiadau byw.
Mae Pride Cymru'n ddigwyddiad blynyddol sy'n parhau i dyfu, ac mae wedi derbyn mwy o bobl nac erioed o'r blaen wedi cofrestru eleni, gyda disgwyl dros 50,000 i fynychu.
Am y tro cyntaf eleni, mae pedwar llwyfan - dau yn fwy nag yn y gorffennol.
Mae'r Llwyfan Gymunedol yn cael ei noddi gan S4C mewn ymgais i hyrwyddo dwyieithrwydd a chymunedau amrywiol Cymru.
Y brif nod yw rhoi rhagor o gyfleoedd i berfformwyr Cymraeg ymgolli yn eu diwylliant, cerddoriaeth a'u doniau – ond mae'r trefnwyr yn dweud hefyd ei fod yn gyfle i amddiffyn hawliau cymunedau LHDTC+ mewn cyfnod sydd wedi bod yn heriol yn wleidyddol.
Yn siarad ar raglen Dros Frecwast fore Gwener dywedodd Meg John, rheolwr cefnogi digwyddiadau Pride Cymru, y bydd "y ffocws lot mwy ar y gymuned eleni".
Awgrymodd fod S4C, sy'n noddi un o'r llwyfannau, am atynnu rhagor o leisiau Cymraeg i'r digwyddiad ac am hyrwyddo cynrychiolaeth "well o'r Gymraeg".
Ond mae peth bryder wedi bod am y tymheredd uchel sy'n cael ei ragweld yn y brifddinas dros gyfnod yr ŵyl.
"Mae'r tywydd yn grêt i gael pobl i mewn, ond hefyd, mae hi am fod yn dwym – mae'n rhaid i bobl wneud yn siŵr eu bod yn cadw eu hunain yn saff," meddai Meg John.
Mae rhagor o wybodaeth yn cael ei rannu ar gyfrifon cyfryngau cymdeithasol Pride Cymru, ac mae gorsafoedd dŵr o amgylch y safle.
Mwy o berfformwyr Cymraeg
Gan y bydd pedwar llwyfan eleni, mae mwy o le ac amser i'w cynnig ar gyfer perfformwyr Cymraeg.
Mae drags Cymraeg gan gynnwys Anniben, Catrin Feelings a Connie Orff yn perfformio, ynghyd â pherfformiadau gan DJs a bandiau.
Rhai enwau cyfarwydd eraill fydd yn arwain perfformiadau nos Sadwrn a Sul yw Ella Henderson ac Una Healy.