Cathraiche ùr aig Caidreachas Croitearachd na h-Alba
- Air fhoillseachadh
Chaidh cathraiche ùr ainmeachadh air Caidreachas Croitearachd na h-Alba.
'S e Dòmhnall MacFhionghain a bhuineas do dh'Àrnol air taobh siar Leòdhais.
Bha e ron seo os cionn Chroitearan Òga an SCF fad iomadh bliadhna.
Bha Mgr MacFhionghain cuideachd na leas chathraiche air an SCF fhèin san dà bhliadhna mu dheireadh.
Thuirt e gu bheil bliadhna thrang ron bhuidhinn agus croitearachd san fharsaingeachd mar thoradh air Brexit gu sònraichte.
"Tha a bhith a' cur cùil ris an Aonadh Eòrpach, a' Mhargaidh Shingilte agus Aonadh nan Cusbainn a' dol a chruthachadh iomadh dùbhlan dhuinn", thuirt Dòmhnall MacFhionghain.
"Tha sgeama ùr shubsadaidhean ga dhealbh a thèid an àite taic Eòrpaich agus feumaidh croitearachd a bhith air a riochdachadh, gu h-àraidh a thaobh taic 'son sgìrean dùthchail.
"Tha e cho cudromach 's a ghabhas gun dèan croitearan strì còmhla airson ar còirichean a dhìon", thuirt e.