Dùil ri seirbheis-aiseig air ais eadar Ùige, An Tairbeart is Loch nam Madadh Dihaoine

Thuirt Caledonian Mac a' Bhriuthainn gu bheil iad an dòchas gun gabh seirbheisean aiseig eadar Ùige, An Tairbeart agus Loch nam Madadh ath-stèidheachadh Dihaoine.

B' fheudar an MV Hebrides a thoirt far na slighe agus a chur gu Abhainn Chluaidh Dimàirt airson obair a dhèanamh air an t-siostam smàlaidh, a' fàgail chùisean bun os cionn do luchd-siubhail.

Ann am brath-naidheachd Diaordaoin dhearbh CalMac gum bi iad a' toirt an MV Isle of Mull far na slighe àbhaistich aice eadar an t-Òban agus Muile airson na seirbheis eadar Uibhist a Tuath, Na Hearadh agus an t-Eilean Sgitheanach.

Thuirt Àrd-oifigear ChalMac, Robbie Druimeanach: "Rinn sinn ar dìcheall dèanamh cinnteach àite air bòrd shoithichean eile fhaighinn dhan a h-uile duine a bha còir siubhal air an Hebrides an t-seachdain seo.

"Ach ràinig sin ìre far am b' fheudar dhuinn plana eile a chur an gnìomh.

Fuasgladh eadar-amail

Thèid bàtaichean a ghluasad eadar na diofar shlighean airson sin a choileanadh.

"Thig an Isle of Mull gu Loch nam Madadh feasgar agus 's e an MV Coruisk a bhios a' seòladh na h-àite eadar an t-Òban agus Creag an Iubhair," mhìnich Mgr Druimeanach.

"'S e fuasgladh eadar-amail a tha seo gus am bi an Hebrides air a càradh. Tha dùil gum bi an obair sin deiseil oidhche Shathairne agus tha dùil againn gum bi i air ais ann an seirbheis Là na Sàbaid.

"Chan e an fhreagairt as fheàrr a bhith a' gluasad shoithichean ach gu math tric 's e an aon roghainn a th' againn ma tha sinn a' dol a chumail oirnn a' ruith sheirbheisean riatanach.

"Tha mi garbh duilich mun bhuaidh air luchd-siubhail agus coimhearsnachdan an dèidh call an Hebrides."