Raon-deighe Inbhir Nis gus dùnadh fad trì mìosan

Bidh Raon-deighe Inbhir Nis dùinte airson trì mìosan airson cosgaisean a ghearradh.

Ach cuiridh iad rudan eile air adhart anns an ionad mar thachartasan ciùil airson airgead a thoirt a-steach.

Bidh an raon gun deigh eadar an Giblean agus an t-Ògmhios.

Bidh spòrs deighe de gach seòrsa ga chluich aig an raon-deighe, nam measg spèileadh-shamhlaidhean, croladh is hocaidh-deighe.

Thuirt a' bhuidheann-charthannais a bhios a' ruith an raoin-deighe gun leaghadh iad an deigh às dèidh dhan t-seusan crolaidh a bhith air thighinn gu ceann.

Falamh

"Chan eil sinn a' dèanamh airgid gu leòr bho thachartasan air an deigh a-mhàin is mar sin dheth gus an goireas seo a chumail fosgailte feumaidh sinn barrachd thachartasan far na deighe a chur air dòigh," thuirt Cathraiche Ionad-deighe Inbhir Nis, Mìcheal Green.

"As t-samhradh, aig amannan, 's ann mar an Marie Celeste a tha an t-àite seo, tha e falamh là as dèidh là.

"Bidh spòrs-deighe fhathast a' dol an seo fad naoi mìosan den bhliadhna."

Am measg nan tachartasan a tha iad an dùil a chumail tha cuirmean-ciùil, agus fèisean uisge-beatha agus gin.

Bidh tachartas bogsaidh ann cuideachd, air a bheilear a' toirt "Thriller in the Chiller".