"Togail fìor mhòr" 'son ICT
- Air fhoillseachadh
Thuirt àrd-choidse Chaley Thistle gu bheil an cluba air fad air "togail mòr" fhaighinn às dèidh dhaibh an gnothach a dhèanamh 2-1 air Cove Rangers aig an deireadh-sheachdain.
'S e seo a' chiad gheama a bhuannaich ICT bhon a chaidh an cluba ann an rianachd is bhon a chaidh Scott Kellacher fhèin os cionn na sgioba.
'S iad tadhail bho dhithis Leòdhasach a rinn a' chùis dhaibh le Adam MacFhionghain is Keith Bray air an targaid às dèidh do Mitch Megginson Cove a chur air thoiseach.
Bha neach-glèidhidh Musa Dibaga nas tràithe air breab-peanais a stad nuair a bha e 1-0
Ged a tha ICT fhathast aig bonn na lìge, tha iad a-nise air gluasad bho -2 gu 1 phuing sa chlàr.
"Cha robh sinn air buannachadh ann an ùine is nuair a fhuair Cove an tadhal chaidh na cinn sìos rud beag", thuirt Kellacher.
"Fhuair iad an uair sin breab-peanais is cha robh e a' coimhead ro mhath ach rinn Musa Mòr cho math is bha mi a' faicinn gun robh misneachd a' dol tron sgioba.
"'S e tadhal air leth bho Adam a chuir sinn air sa gheama is bha sinn mar sgioba eadar-dhealaichte san dàrna leth.
Cead do stuth Facebook?
Tha stuth bho Facebook an lùib an artagail seo. Tha sinn a’ sireadh cead bhuat mus tèid dad a luchdachadh, thoireadh ‘s dòcha gun cleachd iad briosgaidean agus teicneòlas eile. Faodaidh tu na poileasaidhean aig Meta ‘son Facebook mu bhriosgaidean a leughadh, taobh a-muigh agus am poileasaidh prìobhaideachd aca, taobh a-muigh mus gabh thu ris. Airson coimhead air an stuth seo buail air ‘gabh ris agus lean air adhart’.
"Tha mi cho toilichte dhaibh oir tha iad uile air obrachadh cho cruaidh. Tha fios againn cho mòr 's a tha an dùbhlan ach 's e togail fìor mhòr a th' ann dhuinn".
Cuiridh ICT a-nise fàilte air Alloa ann an Inbhir Nis Disathairne seo tighinn.
Tha na Wasps an-dràsta aig mullach na lìge, ged nach eil ach ceithir puingean eadar iad fhèin agus Mon Rois san t-seachdamh àite.
Thuirt Kellacher gur e geama mòr eile a bhios ann do dh'Inbhir Nis.
Tha e ag ràdh cuideachd gu bheil taic an luchd-leantainn fìor chudromach dhan sgioba.
"Thàinig iad ann an deagh àireamhan gu Cove is tha e cho math fhaicinn. Tha sinn uile a' tarraing còmhla - na cluicheadairean, an luchd-obrach is an luchd-taic, a h-uile dùine aig a' chluba
"S e ceum air adhart a tha seo is tha fòcas againn a-nise air Disathairne an aghaidh Alloa", thuirt e.
Cead do stuth YouTube?
Tha stuth Google YouTube an cois an artaigil seo. Tha sinn a’ sireadh cead bhuat mus tèid sìon luchdachadh, oir dh’fhaodadh iad ‘briosgaidean’ agus teicneòlas eile a chur an sàs. ‘S dòcha gum biodh tu airson poileasaidh nam briosgaidean aca a leughadh, taobh a-muigh a leughadh agus am poileasaidh prìobhaideachd aca, taobh a-muigh mus tèid thu air adhart. Airson sùil a thoirt air an stuth seo, tagh ‘Gabh ris agus lean ort’.