Seinneadair Sgitheanach ann an Talla Cliùiteach Ceòl Traidiseanta na h-Alba

Chaidh Anna Mhàrtainn, às an Eilean Sgitheanach, ainmeachadh ann an Talla Cliùiteach Ceòl Traidiseanta na h-Alba airson seinn agus airson òrain a chruinneachadh.

'S e a' bhuidheann Hands Up For Trad, a bhios a' togail ìomhaigh chiùil thraidiseanta ann an Alba, a chuir an t-urram air an t-seinneadair a tha stèidhichte ann an Tròndairnis.

Chaidh sia ceòlaidearan no còmhlain eile ainmeachadh airson sàr-obair a dhèanamh air an àrd-ùrlar, ann an teagasg, no a' glèidheadh chiùil thraidiseanta no airson beachdan ùra a chur air adhart.

Thuirt Anna Mhàrtainn nach robh dùil aice ris a leithid idir.

"'S e a bhith a' toirt nan òran sin a-mach air, cha b' ann air an àrd-ùlar ach fiù s anns na sgoiltean.

"A' tarraing dhaoine dha na seann òrain, 's e sin na h-uiread a tha mise a' feuchainn ri dhèanamh," thuirt i.

Chaidh Murchadh Dòmhnallach, Murchadh 'Wasp', nach maireann, a bha na sheinneadair agus a choisinn cliù mar chluicheadair bogsa-ciùil ainmeachadh anns an liosta.

Còmhla riutha-san, bha am pìobaire Richard Parkes MBE, an còmhlan JSD Band, an seinneadair Billy Jolly à Arcaibh, David Cunningham a tha a' cluiche a' bhogsa agus a tha an sàs ann an obair stiùidio airson ceòl a ghlèidheadh agus an seinneadair traidiseanta Sylvia Barnes.

Thèid an t-urram a bhuileachadh orra gu h-oifigeil aig tachartas sònraichte mar phàirt de Dhuaisean Ceòl Traidiseanta na h-Alba aig MG Alba.

Bidh a' chuirm ga cumail ann an Inbhir Nis air an 30mh den t-Samhain.