Iarrar air comhairlichean cead do dh'ùrachadh tuath-ghaoithe san Eilean Sgitheanach a dhiùltadh

Thathar airson na seann chrainn a thoirt air falbh is feadhainn ùra a chur suas

Chaidh iarraidh air comhairlichean Gàidhealach cur an aghaidh ùrachadh air tuath-gaoithe san Eilean Sgitheanach.

Tha an luchd-leasachaidh Renantis a' moladh na 12 crann-gaoithe aig Tuath-Gaoithe Bheinn Acadail faisg air Dùn Bheagain a thoirt a-nuas agus naoi feadhainn ùra a chur ann.

Tha iad cuideachd a' sireadh taice airson sgeama stòraidh bhataraidhean.

Bhiodh na crainn ùra cho àrd ri 200m - a dhà uimhir nas àirde na an fheadhainn a th' ann an-dràsta.

Tha luchd-planaidh aig Comhairle na Gàidhealtachd ag ràdh gun toireadh leasachadh an tuath-ghaoithe, a tha 18 bliadhna de dh'aois, droch bhuaidh air an àrainneachd agus air seallaidhean.

'Droch bhuaidh air an àrainneachd is seallaidhean'

Tha a' chompanaidh air plana eile a mholadh airson crainn a bhiodh rud beag na bu lugha, 180m, a rèir athisg a thèid air beulaibh comataidh dealbhachaidh a' chinn a tuath.

Tha oifigich na comhairle air moladh nach cuir a' chomataidh taic ris an iarrtas.

Thuirt iad gum faodadh an leasachadh droch bhuaidh a thoirt air talamh mòintich agus milleadh a dhèanamh air na seallaidhean ann an iar-thuath an Eilein Sgitheanaich.

Thuirt an luchd-planaidh cuideachd gu bheil dragh orra mun droch bhuaidh a bhiodh aig an leasachadh air làrach ghàrraidhean Chaisteil Dhùn Bheagain.

Cha do ghabh Comhairle na Gàidhealtachd ri na planaichean ann an 2024 ann an co-chomhairleachadh a rinn Riaghaltas na h-Alba.

Tha dùil gun tèid sgrùdadh poblach ionadail a chumail air na planaichean nas fhaide den bhliadhna.