Comann nam Pàrant "dòchasach" mu àiteachan an Sgoil-Àraich Phort Rìgh

Tha an sgoil-àraich an cois Bun-Sgoil Ghàidhlig Phort Rìgh

Tha dòchas gum bi àite gu leòr dhan a h-uile leanabh aig Sgoil-Àraich Ghàidhlig Phort Rìgh an dèidh saor-làithean an t-Samhraidh.

Tha na h-àireamhan a tha a' clàradh a' sìor èirigh gu ìre agus gun robh dragh ann nach biodh rùm gu leòr ann.

Ach tha cùisean beagan nas cinntiche an dèidh do Chomann nam Pàrant ann am Port Rìgh coinneachadh ri oifigich bho Chomhairle na Gàidhealtachd Diciadain.

"'S e suidheachadh gu math dòchasach a th' ann," thuirt Emma Burrows bho Chomann nam Parant.

"Ann am Port Rìgh tha foghlam tro mheadhan na Gàidhlig air a bhith cho soirbheachail agus air fàs cho luath agus gu bheil feum aca air barrachd rùm anns an sgoil-àraich.

"An-dràsta chan fhaod ach 60 pàiste a bhith anns an sgoil-àraich.

"Ach tha na h-iarrtasan bho phàrantan air a dhol fada seachad air sin agus tha sinn a' coimhead airson fuasgladh dhan ghnothach an-dràsta feuch dè ghabhas dèanamh gus nach urrainn do dhuine sam bith casg a chur air àireamhan nan sgoilearan anns an sgoil-àraich.

"Ceart agus cothromach"

"An toiseach bidh sinn a' coimhead air Coimisean a' Chùraim, feuch an dèan iadsan rud sam bith airson cead a thoirt dhuinn barrachd chloinne a bhith againn anns an sgoil-àraich.

"Mura h-obraich sin, plana B, uill, sin coimhead ri bhith a' dèanamh barrachd rùm anns an sgoil mar a tha i an-dràsta, no air làrach na sgoile.

"Dh'fhaodadh gum bi feum air 's dòcha fuasgladh eadar-amail, togalach nach eil maireannach mar gum biodh, a chur ris an sgoil," thuirt i.

Chan eil e fhathast soilleir an dèidh na coinneimh oidhche Chiadain am faigh a h-uile pàiste a tha ga iarraidh àite anns an sgoil-àraich an dèidh samhradh na bliadhna seo ge-tà.

Ach tha a' Bh-Ua. Burrows misneachail nach tèid àite a dhiùltadh do dhuine.

"Chan eil adhbhar sam bith aig Comann nam Pàrant a bhith a' creidsinn gu bheil Comhairle na Gàidhealtachd a' coimhead ri àireamhan foghlam tro mheadhan na Gàidhlig a chuingealachadh," thuirt i.

"Ach cumaidh sinn sùil air a' ghnothach, agus cumaidh sinn oirnn a conaltradh leis a' Chomhairle anns na seachdainnean a tha romhainn feuch dè ghabhas dèanamh gus sin a sheachnadh.

"Tha làn-earbsa againn gun dèan Comhairle na Gàidhealtachd an rud a tha ceart agus cothromach don Ghàidhlig, agus tha sinne ann airson taic a chumail ri pàrantan a tha ag iarraidh àite ann am foghlam tro Ghàidhlig."