Càintean parcaidh gu leòr air luchd-tadhail san Eilean Sgitheanach

Chaidh "cuibhreann nach beag" de chàintean parcaidh luach £430,000 san Eilean Sgitheanach air luchd-tadhail.

Thàinig am fiosrachadh am bàrr ann an aithisg a chaidh air beulaibh Comataidh an Eilein Sgitheanaich agus Ratharsair aig Comhairle na Gàidhealtachd.

Tha an aithisg ag ràdh gu bheil càintean PCN san Eilean Sgitheanach air a bhith ag èirigh thairis air a' chòig bliadhna mu dheireadh.

Bha 2,784 PCN san Eilean Sgitheanach ann an 2020 is 7,011 an-uiridh.

Chaidh còrr is 2,670 a thoirt seachad thuige seo am-bliadhna.

Tha an aithisg ag ràdh gun deach càintean £430,000 a thoirt seachad eadar an Giblean 2024 is am Màrt 2025.

'S ann aig àitichean a tha a' tarraing tòrr luchd-turais a bha cuid de na h-àireamhan a b' àirde.

Chaidh cha mhòr 1,000 càin - luach £56,350 - a thoirt seachad aig pàirce chàraichean aig an Stòr.

Bha an t-suim as motha - £81,850 - aig Bayfield ann am Port Rìgh.

Tha an aithisg ag ràdh gun tèid sa chumantas 70% de chàintean parcaidh a chruinneachadh air a' cheann thall, ged a tha e uaireannan a' toirt bhliadhnaichean.

Thuirt Comhairle na Gàidhealtachd gu bheil grunn adhbharan air cùl an àrdachaidh a th' ann an càintean.

Nam measg, tha iad ag ràdh, tha riaghladh a bharrachd air raointean parcaidh is barrachd oifigearan.

"Tha cuid de na h-àitichean far a bheil tòrr chàintean air an toirt seachad a' tarraing tòrr luchd-tadhail is tha coltas ann gu bheil luchd-tadhail a' dèanamh suas cuibhreann nach beag dhiubh," thuirt neach-labhairt.

Thuirt iad gur e adhbhar dragh a th' ann am briseadh riaghailtean parcaidh is gu bheil e comasach dhan phoball fios a chur thuca mu shuidheachaidhean den leithid air an làraich-lìn aca.

Tha figearan fa leth aig an ùghdarras ionadail a' sealltainn gun deach mu £1.3m de chàintean PCN a thoirt seachad air feadh na Gàidhealtachd an-uiridh, an àireamh as àirde bho thòisich iad a' clàradh an fhiosrachaidh ann an 2016.

'S ann an Inbhir Nis a bha an àireamh a b' àirde dhiubh, is an uairsin an t-Eilean Sgitheanach is Loch Abar.

Aig an ìre seo chaidh £877,556 a chruinneachadh is £221,552 a chur an dàrna taobh.

Thuirt àrd-stiùiriche Caidreachas Turasachd na h-Alba, Marc Crothal, gu bheil luchd-turais - tòrr dhiubh às Alba fhèin - a' cur gu mòr ri eaconamaidhean eileanach.

Thuirt e gun do chosg luchd-turais £10.5bn ann an Alba an-uiridh, a' cumail taic ri cha mhor 250,000 cosnadh.

"Tha turasachd sheasmhach aig cridhe ro-innleachd turasachd nàiseanta na h-Alba, Scotland Outlook 2030," thuirt Mgr Crothal.

"Bhiomaid a' brosnachadh dhaoine a bhith tuigseach is urram a shealltainn do mhuinntir an àite nuair a tha iad a' tadhal," thuirt e.