Naidheachdan 11:00m

An Eaconomaidh

Dh'aidich an Seansalair, Rachel Reeves, gu bheil dùbhlan mòr air thoiseach air an riaghaltas agus iad a' feuchainn ri eaconomaidh na Rìoghachd Aonaichte a chàradh. Tha àireamhan ùra bho OIfis nan Staitistig Nàiseanta a' sealltainn nach tàinig fàs sam bith air an eaconomaidh eadar an t-Iuchar agus an t-Sultain. Bha an ONS an toiseach a' smaointinn gum faca sinn fàs eaconamach de 0.1% thairis air na trì mìosan sin. Dh'iarr am ministear caibineit dùbhlanach, Stiùbhart Andrew, air an riaghaltas beachdachadh a-rithist air na co-dhùnaidhean a rinn iad sa bhuidseat.

Binnean-bàis

Chuir an ceann-suidhe Joe Biden às dha na binnean-bàis aig a' mhòr-chuid de na 40 prìosanach feadaralach air Death Row sna Stàitean Aonaichte agus e gan atharrachadh gu binn-bheatha sa phrìosan as aonais paròl. Cuiridh an gluasad maill air planaichean a' chinn-suidhe taghte, Dòmhnall Trump, greasad a chur air a bhith a' cur daoine gu bàs ann am prìosanan stàite na dùthcha nuair a gheibh e air ais ann an cumhachd san Fhaoilleach.

Tubaist bus

Chaidh casaid a chur às leth draibhear bus às dèidh tubaiste aig drochaid rèile ann an Cille Mheàrnaig air an t-seachdain a chaidh. Thuirt Poileas Alba gun deach casaidean a chur às leth fear aois 34 co-cheangailte ri mar a chaidh am mullach a shracadh far bus Stagecoach Diardaoin. Chaidh ochdnar luchd-siubhail a thoirt dhan ospadal às dèidh na tubaiste, ach chan eil e air aitrhris gun robh gin dhiubh air an droch ghoirteachadh.

Tubaist rathaid

Bhàsaich fireannach ann an tubaist rathaid air an M74 ann an Siorrachd Lannraig a Deas. Chaidh an duine, a bha 65 agus a bh' aig cuidheall Porsche Boxter, a mharbhadh nuair a bhuail e ann an grunn charabadan eile mas deach e a-steach gu tèarmann-meadhain an rathaid. Thachair an tubaist mu 06:00f feasgar an-dè faisg air an Ruadh Ghleann. Chaidh dithis dhraibhearan eile - boireannaich sna 40an - a thoirt dhan ospadal. Bha an rathad dùinte airson grunn uairean de thìde agus tha na poilis a' sireadh fianaisichean.

Rabhadh bho dhotairean

Thàinig rabhadh sàbhailteachd bho dhotairean èiginn 's iad ag iarraidh air pàrantan a bhith faiceallach mu bhith a' ceannach ghriogagan boga, water beads, do chloinn òg airson na Nollaige. Tha luchd meidigeach ag ràdh nach bu chòir na grìogagan dathte a thoirt do chloinn fo aois còig bliadhna oir tha iad cunnartach ma thèid an sluigeadh.

Crogall

Agus bhàsaich an crogall Astràilianach a thàinig gu aire an t-saoghail ann an 1986 sa fiolm Crocodile Dundee. Thuirt Crocosauras Cove, an sù ann an Darwin far an robh Burt air a bhith a' fuireach bho 2008, gun do bhàsaich e air an deireadh-sheachdain. Tha eòlaichean a' measadh gun robh e còrr is 90 bliadhna de dh'aois.