Uan Wonky Thiriodh a' sìor chosnadh cliù
- Air fhoillseachadh
Tha i àraid, tha i cute is abair gu bheil i ainmeil.
Cò eile ach Wonky, an t-uan Tiristeach a tha a' sìor chosnadh cliù dhi fhìn anns gach ceàrn.
Bha toiseach-tòiseachaidh rudeigin doirbh aig Wonky bheag bhochd is i air pronnadh le bràthair - brùid de dh'uan tha e coltach - fhad 's a bha i a' dèanamh a slighe a-steach dhan t-saoghal.
Dh'fhàg sin gun do rugadh i le car na h-amhaich. Rudeigin Wonky.
Ach ged a bha dragh ann gur dòcha nach maireadh i fada, tha i a-nise a' gabhail bainne bho màthair agus a' dol bho neart gu neart.
"Tha Wonky gu sprogail, tha i a' dèanamh cho math," thuirt Rhoda Meek, leis a bheil Wonky (is a chuir an t-ainm oirre).
"Tha i a-nise a' ruith is a' leum. Chan eil i buileach a' cur charan ach chan eil i fad às."
Ach tha gu leòr eile a tha a' cùr charan mu Wonky is i air a dhol bhioral anns na làithean mu dheireadh.
"Tha dà mhillean gu leth duine air Wonky fhaicinn air TikTok," mhìnich Rhoda.
Is chan e sin e a-mhàin.
"Tha following aice air Instagram a tha do-chreidsinneach. Thòisich sinn le 1,500 neach Diluain seo chaidh is dh'fhosgail mi mo shùilean an-diugh sa mhadainn is bha 72,000 aice.
"Tha i cute, chan eil dòigh mun cuairt air."
Cute ann no às ge-tà, tha Rhoda den bheachd gu bheil adhartas Wonky ann an suidheachadh doirbh cuideachd air togail a thoirt do dhaoine.
Anns na h-amannan mì-chinnteach anns a bheil sinn beò, tha e coltach gur e togail a tha sin air a bheil gu leòr a' cur feum.
"Bha dragh oirnn an toiseach ach tha e a-nise a' dèanamh cho math agus san t-saoghal a th' ann tha mi a' smaointinn gu bheil good news story a' còrdadh ri daoine."
Agus tha sgeulachd is cliù Wonky cuideachd a' dol a dhèanamh cinnteach nach land i air truinnsear air a' cheann thall.
Ge brith dè an t-iarrtas a th' ann air feòil uain anns na mìosan ri tighinn, tha Wonky bheag sàbhailte gu leòr.
"Ged a tha mi a' dèanamh croitearachd 'son biadh tha Wonky a' fantail air a' chroit cho fada 's a tha i airson sin a dhèanamh," thuirt Rhoda.
"Tha dachaigh aice".