Droch theine mòintich aig Stac Pollaidh

Tha luchd-smàlaidh fhathast an làthair aig teine mòintich a sgap faisg air Stac Pollaidh, tuath air Ulapul, madainn na Sàbaid.

Chaidh fios a chur air na seirbheisean mu 08:24m.

Bha sia carbadan-smàlaidh an sàs agus chaidh iarraidh air a' phoball cumail air falbh.

Le toit thiugh bhon teine a' toirt buaidh air an sgìre, b' fheudar na poilis rathad Aichilidh Bhuidhe a dhùnadh eadar ceann rathad an A835 agus Bad a' Ghoill.

Chuireadh an dealan dheth airson uair a thìde gu leth feasgar na Sàbaid, leis gun robh an teine a' tighinn faisg air an loidhne-dealain.