Taigh na Sgìre ann am Port Rìgh ga leasachadh

Bidh seirbheisean poblach air an cur còmhla san aon togalach aig a' cheann thall

Dhùin Oifisean Comhairle na Gàidhealtachd ann am Port Rìgh fhad 's a bhios leasachadh mòr a' dol air adhart air an togalach, Taigh na Sgìre.

Mar phàirt den leasachadh thèid seirbheisean poblach a chur còmhla san aon togalach.

Tha oifisean na Comhairle air a bhith stèidhichte ann an Taigh na Sgìre fad iomadach bliadhna, ach chan eil e freagarrach tuilleadh, agus uisge air a bhith a' tighinn a-steach.

Tha dùil gun cosg an leasachadh mu £2.5m.

Tha an leasachadh na 'eisimpleir do bhailtean beaga eile' a rèir comhairliche ionadail Phort Rìgh, Drew Millar

Tha an togalach na dhà phàirt - seann togalach cloiche, agus pàirt nas ùire a ghabh àite an t-seann Drill Hall. 'S e am pàirt as ùire as fheumaiche air leasachadh.

Thèid mullach ùr a chur air agus thèid còmhdach ùr a chur air taobh a-muigh ballachan an togalaich.

Thèid an taobh a-staigh atharrachadh cuideachd; cha bhi an seòmar deasbaid ann tuilleadh, agus thèid oifisean ùra a chruthachadh.

Tha luchd-obrach na Comhairle air gluasad a-mach gu diofar àiteachan ann am Port Rìgh fhad 's a leanas an obair-leasachaidh.

'Barrachd cho-obrachaidh'

Nuair a tha an obair deiseil, a thuilleadh air luchd-obrach na Comhairle, bidh oifisean ann do bhuidhnean eile leithid HIE, NàdarAlba, VisitScotland agus Biùro Comhairleachaidh a' Phobaill.

"Bu chòir gur e eisimpleir a bhios ann 's dòcha do bhailtean beaga eile air mar a ghabhas na seirbheisean uile a chur còmhla," thuirt comhairliche ionadail Phort Rìgh, Drew Millar.

"Agus mar a dh'obraicheas iad le chèile cuideachd, oir tha sinn uile ag obair às leth luchd-pàighidh nan cìsean a chùm buannachd na coimhearsnachd.

"Ceadaichidh seo barrachd cho-obrachaidh na th' air a bhith ann roimhe."

Tha dùil gum mair an obair-leasachaidh mu bhliadhna uile gu lèir.