Dragh mu obair leasachaidh 'son bàt-aiseig a' Chorrain
Feumar an obair leasachaidh air bun-structar air gach taobh de dh'Aiseag a' Chorrain airson a' bhàt'-aiseig ùir dealanach a bhios ann
- Air fhoillseachadh
Tha dragh ann nach eil planaichean Comhairle na Gàidhealtachd airson na goireasan taobh Àird Ghobhar de dh'Aiseag a' Chorrain math gu leòr.
Tha na planaichean airson mar a ghabhas bun-structar co-cheangailte ri bàt'-aiseig a' Chorrain gan deasbad le comhairlichean Gàidhealach Dimàirt.
Tha an obair a dhìth airson a' bhàt'-aiseig dealain ùr a tha gu bhith air an t-slighe.
Am measg na thathar a' moladh 's e lamraigean concreit, balla-fasgaidh agus bun-structar a leigeas le soitheach a bhith ceangailte air an oidhche an Àird Ghobhar.
Seo an ìre mu dheireadh de chòmhradh mus tèid cead-dealbhachaidh iarraidh.
Tha Màiri Anna NicUalraig a' fùireach ann an Àird Ghobhar agus tha i am measg na tha a' togail dragh gum bi na h-aon duilgheadasan aca a thaobh trafaig agus carbadan a sgaoileadh a-mach dhan rathad mhòr 's a th' ann an-dràsta.
"Tha sinn gu math soilleir den bheachd nach e seo an t-slighe cheart air adhart," thuirt Ms NicUalraig.
Tha dragh air Màiri Anna NicUalraig mun bhuaidh a bhios air an obair-leasachaidh air na tha a' fuireach air an taobh aice-se de dh'Aiseag a' Chorrain
Mhìnich iad an cuid draghan do Chomhairle na Gàidhealtachd mun seo, tha i ag ràdh.
Thuirt i: "A bhith cothromach do luchd-obrach na Comhairle, chan eil gu leòr airgid ann airson an leasachadh a tha dhìth a dhèanamh gu ìre a bhios a' freagairt air gach taobh den aiseag an-dràsta.
"Ach seo an taobh far a bheil daoine a' tighinn beò agus tha iad a' crochadh air seirbheis an aiseig ged a bhitheadh barrachd chàraichean a' tighinn bhon taobh eile, rud nach eil mise an dùil a tha fìor o chionn ma thèid iad ann feumaidh iad tighinn às.
"'S e an taobh againne far a bheil taighean, clann, obraichean agus gnìomhachasan.
"Sin far a bheil an obair mhòr gu bhith a' tachairt agus ma tha sibh a' dol a bhith a' cur bheathan bun os cionn le leasachadh air bun-structar feumaidh sibh rud a dhèanamh a tha a' dol a fhreagradh air a' choimhearsnachd againne," thuirt Ms NicUalraig.