Leasachadh aig Ospadal nan Eilean

Tòisichidh pròiseact a bhios ag amas roinn-èiginn Ospadal nan Eilean Siar ann an Steòrnabhagh ath-nuadhachadh an ath mhìos.

Thèid mu £1m a chosg air an obair, le amas barrachd àite a dhèanamh airson obair chlionaigich.

Tòisichidh obair air a' phròiseact air an t-17mh là den Ghearran, agus dùil gun lean cùisean gu deireadh a' Ghiblein.

An uairsin, thathar an dòchas gum bi an t-ospadal ann an suidheachadh nas treasa airson taic a thoirt dhaibhsan a tha feumach air ath-dhùsgadh, le na bhios ann de dh'àiteachan airson an leithid de dh'euslaintich ag èirigh gu trì.

Thèid aig aonan de na h-àiteachan sin cuideachd a bhith air a chleachdadh mar dhà sheòmar airson dèiligeadh ri euslaintich eile.

Thathar ag amas gaothrachadh an togalaich cuideachd a dhèanamh nas fheàrr anns an roinn, le siostam ùr airson leigeil le euslaintich taic iarraidh air nursaichean cuideachd gu bhith an sàs.

Bho mheadhan na h-ath-mhios, thig atharrachaidhean air dòighean obrach an ospadail anns an eadar-ama, leis an roinn-èiginneach ga gluasad dhan taobh eile den ionad fàilte, le luchd-stiùiridh cuideachd gu bhith an làthair airson taic a thoirt a thaobh parcadh mun ospadal.

Gheibhear tuilleadh fios air làrach-lìn NHS nan Eilean Siar.