Naidheachdan 11:00m

Rosebank

Chuir britheamh aig Cùirt an t-Seisein ann an Dùn Èideann às dhan chead do dh'ath-leasachadh ola agus gas connspaideach anns a' Chuan a Tuath. Thuirt am britheamh nach tug luchd-leasachaidh raointean Rosebank agus Jackdaw spèis do bhuaidh connadh fosail air an àrainneachd. Thig orra-san a-niste cead às ùr iarraidh bho Riaghaltas na Rìoghachd Aonaichte ged a tha an dà raon gu math faisg air tòiseachadh air tolladh.

Washington

Tha sgiobannan teasairginn ann an Washington fhathast a' coimhead airson feadhainn a dh'fhaodadh a bhith beò an dèidh do phlèana le luchd-siubhail agus heileacoptair airm bualadh na chèile os cionn Abhainn Photomac. Bha 64 air a' phlèana agus triùir anns an heileacoptair. Tha a' bhuidheann naidheachd CBS ag ràdh gun deach naoi corp deug a thoirt às an uisge.

An Seansalair

Dh'innis an Seansalair, Rachel Reeves, dhan BhBC nach urrainn do Mhèar Lunnainn, Sir Sidiq Khan, stad a chur air an leudachadh a tha san amharc aig Port Adhair Heathrow. Thuirt i gu bheil an riaghaltas gu math cinnteach gun tèid leotha ann an ath-sgrùdadh laghail mu bhuaidh an sgeama air an àrainneachd.

Saighdear Isrealach

Chaidh saighdear Isrealach a bha am bruid aig Hamas a shaoradh. 'S i Agam Berger, a tha 22, a' chiad thè de thriùir Isrealach a tha dùil a gheibh saorsa an-diugh. Tha Hamas ag ràdh gun saor iad dithis Isrealach eile agus còignear a bhuineas do Thailand ro dheireadh an là.

Am Post Rìoghail

Tha an riaghladair Ofcom a' moladh cead dhan Phost Rìoghail sgur a lìbhrigeadh litrichean aig an dàrna ìre, gach dàrna là eadar Diluain agus Dihaoine agus sgur uile gu lèir dhuibh Disathairne. Bhiodh iad a' cur a-mach litrichean na ciad ìre sia là san t-seachdain.

Boireannach a dhìth

Tha poilis ag iarraidh fiosrachaidh mu bhoireannach a chaidh a choiseachd ann an ceann an iar-thuath Chataibh agus air nach eil sgeul bho chionn còrr is seachdain. Buinidh Rasa Kilikevicuite, a tha 33, dhan Ghearasdan ach do Lithuania bho thùs. Chaidh a faicinn mu dheireadh beagan deas air Ceann Loch Biorbhaidh ach bhruidhinn i ri a teaghlach aig toiseach na seachdain seo. Bu chòir do dhuine as aithne dad fios a chur air na poilis air loidhne fòn 101.