Oidhirp uaigh Mairead NicDhonnchaidh ùrachadh
- Air fhoillseachadh
Tha oidhirp a' dol uaigh an t-seinneadair chliùitich Ghàidhlig Mairead NicDhonnchaidh a chàradh agus ùrachadh.
Tha Mairead air a tiodhlaigeadh ann an Cladh Twickenham ann an Lunnainn.
'S iad Còisir Ghàidhlig Lunnainn a tha air cùl na h-iomairt.
Thadhal buill dhen chòisir air an làraich an-uiridh agus mhothaich iad gun robh a' chlach-uaigh aice a' claonadh dhan dàrna taobh agus gun robh i a' cur feum air glanadh agus bha cuid de na litrichean duilich a leughadh.
Roghnaich iad an uairsin iomairt a chur air dòigh airgead a chruinneachadh airson na h-obrach.
Rugadh Mairead ann an Ìle ann an 1888 agus bhuannaich i bonn òir a' Chomuinn Ghàidhealaich ann an 1909.
Ghluais i a Lunnainn far an robh i na ball de Chòisir Ghàidhlig Lunnainn fad iomadh bliadhna.
Chaidh dreuchd an stiùiriche a thabhann dhi ach dhiult i a gabhail leis gum biodh i air falbh cho tric.
Ach bha i air comataidh ciùil na còisir agus 's i a stiùir còisir nam ban nuair a chaidh Còisir Ghàidhlig Lunnainn chun a' Mhòid Nàiseanta airson a' chiad turas nuair a bha e ann an Grianaig ann an 1925.
Chaochail Mairead ann an 1948 agus chuir Comunn Ìleach Ghlaschu stòras cuimhneachaidh air dòigh airson an obair a rinn i a thaobh ceòl Gàidhlig a chomharrachadh.
'S ann às a sin a thàinig Cuach Cuimhneachan Mairead NicDhonnchaidh - tè de dhuaisean mòra nan còisirean sgìreil aig a' Mhòd Nàiseanta Rìoghail.
Thuirt Ceann-suidhe Còisir Ghàidhlig Lunnainn, Fearghas Reoch: "Dà bhliadhna air ais chunnaic sinn an obair a rinn Mairi Anna NicUalraig agus an sgioba airson uaigh Seasaidh NicLachlainn agus shaoil sinn gur e obair mhath agus obair chudromach a bh' ann.
"Mar sin aig a' choinneimh bhliadhnail againn san Fhaoilleach rinn sinn co-dhùnadh gum biodh e freagarrach a' chlach-chinn ath-stèidheachadh mar urram dha na daoine cudromach a bha nam buill ann an Còisir Lunnainn agus dhan choimhearsnachd Ghàidhealach ann an Lunnainn."
Tha a' chòisir a' dèanamh dheth gun cosg an obair mu £2,000.
Thig cnap math dhen airgead sin ann an tabhartas bhon chòisir agus tha a' chòisir cuideachd ag amas airgead a thogail tro thachartasan agus cuirmean.
Chuireadh iad fàilte cuideachd air tabhartasan bho chòisirean eile agus bho dhuine no buidheann sam bith a mhiannaicheadh sin a dhèanamh.
Tha a' chòisir an dòchas gum bi an obair deiseil ron Mhòd Nàiseanta Rìoghail ann an Loch Abar an ath-bhliadhna - a' comharrachadh 100 bliadhna bho bha Mairead a' stiùireadh còisir nam ban ann an Grianaig.