Iarrtas ìomhaigh shnaidhte Inbhir Ghòrdain a chumail an Alba
![Ìomhaigh Sir Iain Ghòrdain](https://ichef.bbci.co.uk/news/976/cpsprodpb/2b75/live/c6a7de80-352f-11ef-a044-9d4367d5b599.jpg)
- Air fhoillseachadh
Tha eachdraiche ealain air iarraidh nach tèid ìomhaigh shnaidhte on 18mh Linn le neach-ealain ainmeil Frangach a chur a-mach à Alba.
Thug Comhairle na Gàidhealtachd cead Diardaoin an ìomhaigh de Shir Iain Gòrdan a rinn Edme Bouchardon a reic airson timcheall air £2.5m.
Cheannaich Comhairle Baile Inbhir Ghòrdain e anns na 1930an air £5.
Tha an ìomhaigh air a bhith ga cumail ann an stòras, 's chan eileas air a bhith ga taisbeanadh.
Thèid an t-airgead gu Maoin Maith Choitchinn Inbhir Ghòrdain.
Ach tha an Dr Caroline MacCaffrey Howarth, a tha na h-òraidiche ann an Eachdraidh Ealain Bhreatannach aig Oilthigh Dhùn Èideann, ag ràdh gu bheil e cudromach nach tèid an ìomhaigh a-null thairis.
"Tha Bouchardon do-chreidsinneach ainmeil," thuirt i.
"'S e seo an aon "bhust" a rinn e de dh'Albannach.
"Bu mhòr an truaighe nam faicte e a' fàgail Alba.
"Ach saoilidh mi gur e as cudromaiche buileach gun tèid a taisbeanadh gu poblach.
"'S e an dragh a th' orm an-dràsta gu bheil e air a bhith ann na stòras, 's nach deach aca air a taisbeanadh - ged a tha fhios againn gun deach a taisbeanadh roimhe aig a' Ghetty agus aig an Louvre - dà thaigh-tasgaidh mòr eadar-nàiseanta.
"Saoilidh mi gum biodh e gu math feumail feuchainn ri cuideigin a lorg ann am Breatainn a cheannaicheadh e, ach b' e a b' fheàrr buileach cuideigin a chumadh an Alba e 's a thaisbeanadh e gu poblach."