Naidheachdan 11:00m

Stoirm Éowyn

Tha còrr is 700,000 dachaigh is gnothachas gun dealan ann am Poblachd na h-Èireann 's faisg air 100,000 an Èirinn a Tuath air an do bhuail Stoirm Éowyn anns a' mhadainn. Tha Rabhadh Dearg - fìor rud ainneamh - cuideachd ann an ceann a deas agus am meadhan na h-Alba far an deach iarraidh air an t-sluagh fuireach a-staigh. Tha Oifis na Sìde ag ràdh gum faodadh a' ghaoth èirigh gu 100msu air cladaichean fosgailte mun iar. Tha seirbheisean aiseig agus rèile dheth. Tha cuid de rathaidean dùinte eadar craobhan a' tuiteam agus sprùilleach, agus tha mòran sgoiltean dùinte.

Taraifean

Thuirt Rùnaire Malairt na Rìoghachd Aonaichte, Jonathan Reynolds, nach bu chòir na cìsean malairt air a bheil an Ceann-Suidhe Trump a' bruidhinn tighinn air stuth à Breatainn. Tha Mgr Reynolds ag ràdh gun dèan iad argamaid nach eil adhbhar orra sin oir tha na Stàitean Aonaichte a' toirt nas lugha stuth à Breatainn na tha iad a' reic ris an dùthaich seo. Thug Dòmhnall Trump rabhadh do cheannardan gnothachais aig Fòram Eaconamach na Cruinne ann an Davos gum bi cìsean malairt air stuth nach tèid a dhèanamh sna Stàitean Aonaichte.

Dùn Èideann

Nì Comhairle Dhùn Èideann co-dhùnadh an-diugh air plana airson cìs thurasachd. Ma thèid bhòtadh air a shon mar a tha dùil a thachras, bidh aig luchd-turais ri 5% a bharrachd a phàigheadh air àiteachan-fuirich mar thaighean-òsta, àiteachan màil ghoirid agus a leithid airson suas ri còig oidhcheannan. Tha dragh air cuid gun toir sin droch bhuaidh air turasachd sa bhaile.

Southport

Dh'iarr ball-pàrlamaid Làbarach Southport, Patrick Hurley, air an Riaghaltas beachdachadh a-rithist air a' bhinn a chaidh air an deugaire Axel Rudukabana a mhuirt triùir nigheannean òga ann an Southport an-uiridh. Chaidh esan a chur dhan phrìosan airson 52 bliadhna, ach cha b' urrainn dhan bhritheamh làn-bhinn beatha a chur air seach nach robh e ach 17 bliadhna aig àm na h-ionnsaigh anns an Iuchar an-uiridh. Thuirt an t-Àrd-Neach-Tagraidh gun tèid sùil a thoirt air a' bhinn a-rithist fo sgeama ath-sgrùdaidh.

Alexandr Benga

Tòisichidh rannsachadh às ùr saor-thoileach air an deireadh-sheachdain airson deugaire a chaidh a dhìth ann an Steòrnabhagh bho chionn còrr is dà mhìos. 'S ann sa Ghearraidh Chruaidh a chaidh Alexandr Benga, a tha 16 bliadhna de dh'aois, fhaicinn mu dheireadh air an 18mh den t-Samhain.