Mowi ann an còmhraidhean ri Organic Sea Harvest

Dhearbh a' chompanaidh Mowi gu bheil iad ann an còmhraidhean ri Organic Sea Harvest às dèidh dhaibhsan innse gum bi iad a' sguir den chuid obrach aig an dà thuathanas-èisg a tha aca air costa ear thuath an Eilein Sgitheanaich.

Thuirt OSH gu bheil iad air ruith a-mach à airgead agus gum bi iad a' falamhachadh nan ceidsichean aca gus an gabh tuilleadh airgid a lorg airson an dà làraich sin, agus 'son làrach eile ùr faisg air Baile MhicCuithein aig a bheil cead-dealbhachaidh aca a leudachadh.

Tha mu 15 daoine ag obair aig a' chompanaidh agus thuirt OSH gun toir iad taic dhan fheadhainn a chailleas an cosnadh mar thoradh air a' cho-dhùnadh seo na làraichean seo fhalamhachadh.

Ann am brath feasgar Dimàirt, dhearbh a' chompanaidh mhòr Mowi gu bheil iadsan a-nise ann an còmhraidhean ri Organic Sea Harvest.