Organic Sea Harvest a' sguir den chuid obrach aig dà thuathanas Sgitheanach

Tha a' chompanaidh àrach èisg Organic Sea Harvest a' sguir den chuid obrach aig an dà thuathanas a tha aca air costa ear thuath an Eilein Sgitheanaich.

Thuirt OSH gu bheil iad air ruith a-mach à airgead agus gum bi iad a' falamhachadh nan ceidseachean aca gus an gabh tuilleadh airgid a lorg airson an dà làraich sin agus 'son làrach eile ùr faisg air Baile MhicCuithein aig a bheil cead-dealbhachaidh aca a leudachadh.

Ann am brath naidheachd, thuirt a' chompanaidh: "'S e Organic Sea Harvest an aon chompanaidh ùr a tha ag àrach bradain a chaidh a chruthachadh ann an Alba ann an iomadach bliadhna, suidheachadh a bha, is a tha sinn fhathast, a' dèanamh gàirdeachais mu dheidhinn.

"Tha sinn air bradan organach air leth a ghiullachd agus bha fèill mhòr air sin air feadh an t-saoghail.

"A dh'aindeoin sin, tha an siostam planaidh agus riaghlaidh ann an Alba air a bhith dùbhlanach agus slaodach agus tha sin a' fàgail gu bheil Organic Sea Harvest air ruith a-mach à goireasan ionmhais.

"Mar thoradh air sin, chaidh co-dhùnadh a ghabhail gus an dà thuathanas a th' ann an-dràsta fhalamhachadh gus an tèid maoineachadh dhan ghnothachas aontachadh, agus tha sin cuideachd a' gabhail a-steach leasachadh air an tuathanas ùr faisg air Baile MhicCuithein", thuirt iad.

Tha mu 15 daoine ag obair aig a' chompanaidh agus thuirt OSH gun toir iad taic dhan fheadhainn a chailleas an cosnadh mar thoradh air a' cho-dhùnadh seo na làraichean seo fhalamhachadh.